Уьстимиздеги айдынъ 13-нши куьнинде Россия Баьтири Рафик Валитович Кадырбулатовка 50 яс толаяк эди. Ол Астрахань областининъ Поименный авылында тувган, йолдасларын явдан коршалав атысында 18 ясында йигитлерше ян берген.

1995-нши йылдынъ 18-нши апрелинде Бамут авылы (Чечня) туьбинде урыста «Росич» спецназ отрядынынъ мергини рядовой Рафик Кадырбулатов, куьшлери арткан явдынъ шапкынлыгын ялгыз иркип турып, 12 боевиклерди атып йок эткен. Каты яраланып эм явдынъ курсап алувына туьсип, ол есирге берилмеген – уьш душпанларды эм оьзин граната ман атып оьлтирген.
1996-ншы йылдынъ 20-ншы июлинде ол Россия Федерациясынынъ Баьтири деген атка тийисли этилинген, аты «Росич» отрядынынъ списогына дайымга киргистилген. Рафик Кадырбулатовтынъ атын юргистедилер Ногай районынынъ Терекли-Мектеб, Калининаул, Ленинаул авылларында эм баьтирдинъ тувган ери – Астрахань областининъ Поименный авылынынъ биринши номерли мектеби.
Йыл сайын Дагестаннынъ Ногай районында Рафик Кадырбулатовтынъ эстелигининъ сыйына бокс бойынша турнир озгарылады. 2026-ншы йылдынъ апрелинде Куьнбатар авылында 11 командалардан 270 спортсменлер йыйылган.
Ол оьлмеген. Ол разведкага кеткен. Дайымлык эс Баьтирге!
Э.Кожаева.