Баьтир болып бирев де тувмайды, авыр сынавларды оьтип, энъ де кыйын заманда эрклик коьрсетип, Эли уьшин, оьз акында ойланмай, аьдемлер баьтирлерге айланадылар. Бизим коьп ердеслеримиз, согыс спецоперация барысында аьскер борышларын толтыраятып, коьрсеткен йигитликлери уьшин орденлер
эм медальлер мен савгаланганлар, оькинишке, яшавлары курман болганлар да бар.
Бизим киели борышымыз – яшавларын Эли уьшин берген йигитлерди эсте саклав эм арамыздагы баьтирлерди оьрметлев.
Ердеслеримиз коьрсеткен баьтирликлери акында эсти саклав ниетте А-Х. Джанибеков атындагы мектебинде шатлыклы аьлде «Баьтирдинъ Партасы»
ашылды. Ол бу мектебтинъ выпускниги, согыс спецоперация катнасувшысы Ибрагим Рустам увылы Юмакаевке багысланган. Шарады баслангыш класслар окытувшысы Юмазиет Айнедин кызы Зарманбетова уйгынлады. Ол бизим заманнынъ баьтирининъ класс етекшиси болган. Юмазиет Айнедин кызы алдынгы окувшысын, ол кыска болжаллы тыншаювга уьйине кайткан аьсерде, коьрмеге неше де барган.
Экинши класс окувшыларынынъ ортакшылык этуьви мен озган шарага согыс спецоперация катнасувшысынынъ анасы Ийсиндик Амзатхан кызы да шакырылды. Окувшылар ога туьрли соравлар бердилер. Балалар баьтир-ердесимиздинъ анасына увылынынъ мектебте окыган йыллары, тенъ дослары эм онынъ ийги касиетлери мен байланыслы соравлар бердилер. Ийсиндик Амзатхан кызы олардынъ соравларына яваплаятып, увылынынъ яшавындагы туьрли оьзгерислерди эсине алды. Юмазиет Айнедин кызы болса, уьйкен оьктемлик пен оьз окувшысы акында айтты. Йолыгыс бек йылы аьлде оьтти,
онынъ балаларды патриотлык яктан тербиялав исинде маьнеси уьйкен эди.
Окытувшы «Баьтирдинъ Партасы» – ол тек мектеб партасы болып калмайтаганын белгиледи. Онынъ соьзлери мен, «Баьтирдинъ Партасы» – шынты баьтирлер бизим арамызда болганлар эм яшайтаганын окувшыларга анъламага ярдам этетаган белги.
Нурият Кожаева.
Суьвретте: йолыгыстан коьринис.