Ногай район орталыгы Терекли-Мектеб авылында Аталыктынъ Баьтирлери куьнинде мундагы парк ортасында орынласкан Мемориаллык комплексинде сол данъклы куьнге багысланган эстеликли митинг болып оьтти.

Шарада Ногай район аькимбасынынъ биринши орынбасары Рашид Шангереев шыгып соьйледи.
– Буьгуьн бизде киели эм эстеликли куьн. Биз буьгуьн Уллы Аталык согысында, Афганистан еринде, Шешен Республикасында эм согыс спецоперациясынынъ барысында ян берген ердеслеримизди эскеремиз.
Олардынъ баьтирлиги эм эрлиги алдында бас иемиз, – деп белгиледи ол оьз соьзинде.
Ол район етекшиси Джамалутдин Эсиргеповтынъ Аталыктынъ Баьтирлер куьни мен байланыста район яшавшыларына каратылган шакырувын окыды.
Митингте солай ок Ногай район Ямагат палатасынынъ председатели Эльмурза Саитов, район аькимбасындагы Ясуьйкенлер советининъ председатели Шатемир Мунгишиев оьсип келеяткан яс несиллерге оьзлерининъ данъклы ата-бабаларынынъ йигитлигин бир де мутпанъыз деген шакырув эттилер.
Кадрия атындагы орта мектебтинъ окувшысы Айганат Байгараева «Аталыктынъ баьтирлерине данък!» деген ятлавды окыды.
Митинг катнасувшылары Аталыктынъ баьтирлерине сый этип, олардынъ йигитликлери алдында бас ийдилер. Шарадынъ сонъында йыйылганлар эстеликке шешекейлер салдылар.
М.Юнусов.