Бизим элимизде бу куьнди 2014-нши йылдан алып белгилеп келедилер. Бу байрам ветеринар куллыкшыларынынъ айванлардынъ эм аьдемлердинъ савлыгын саклавга этетаган косымын айырып белгилев эм ветеринария ман малшылык тармагында эмишликти канагатлав ниет пен беркитилген. Ветеринар специалистлери айванлардынъ да, аьдемлердинъ де савлыгын канагатлай берип, элдинъ азык-туьлик эм биологиялык кавыфсызлыгын беркитуьвге, эпизоотикалык аьлге эм яшавшылардынъ савлыгын саклавга оьз аьрекетин багысланганлар. Ногай район ветеринар управлениесининъ ветеринарлары РФ Авыл хозяйство министерствосынынъ 550-нши номерли буйырыгына коьре, аьлиги заманда район яшавшыларынынъ тувар малына, койларына, эшкилерине, анъ кусларына биркалар салув ис аьрекетин юритедилер. Буьгуьнлерге район еринде бар болган 27 мынънан артык тувар малдынъ 97 процентине эм 400 мынънан артык койлар ман эшкилердинъ 90 процентине биркалар салынган демеге болады. Янъыларда коллектив агзалары янъы окув йылы алдында юритилип турган «Балады мектебке аьзирле!» деген савлайроссиялык акциясында катнаскан. Ногай районы республика еринде эпизоотикалык аьллери яктан ийги деп белгиленеди эм ол зат бизим ветеринар куллыкшыларынынъ етимиси деп саналады. Район ветеринар управление синде кайратлы эм коьпйыллык ис аьрекети уьшин быйыл ветеринар врачлары Каирбек Ярикбаев, Рашид Оразалиев, Алан Картакаев эм Мурат Мусауров Дагестан Республикасынынъ Ветеринария комитетининъ Сый грамоталары ман савгаланганлар. Ис байрамы ман байланыста бу йолдасларды эм сав коллективти (52 аьдем) кутлаймыз, аьр кимге де оьзине берк ден савлыкты, элге керекли ис аьрекетинде уьстинликти, аьелинде эмишликти эм наьсипти йораймыз. 

М-А.Ханов. Суьвретте: Ногай район Ветеринар управлениесининъ куллыкшыларынынъ бир кесеги.