Аьр бир аьдемнинъ касиети кепленип келуьвине оьз себеплигин тийдиретаган аьдемлер расады. Буьгуьнлерде мектебте куллык этетаган аьр ким де яс несилдинъ келеектегиси уьшин яваплы. Бактысында класска оьзи мен суьйимди, кызыксынувларды эм, элбетте, сол суьйим мен оралган билимди аькелетаган окытувшы раскан аьдем энъ де наьсипли. Оьзининъ бай сулыбын янъы яшав йолына туьскен ясларга коьшируьв – ол уьйкен оьнер.
Сав яшав йолын яс несилди билимлендируьвге багыслап келгенлердинъ бириси болады тарих эм обществознание сабагы бойынша дерисиннен окытувшы Танбулатова Мавлетхан Явгайтаровна.
Ол ярты оьмирден артыгын Кумлы авыл окувшыларын билимлендируьвге багыслап, билимин, юрек йылувлыгын, куьш-куватлыгын аямай савкатлап келеди. Окытувшы асылы ман Тарумов районынынъ Чубутла авылында Явгайтар эм Ак-Манев Темировлардынъ коьпбалалы аьелинде тувып оьскен. Кыздынъ бала шагыннан окытувшы болаякпан деген мырады яшавга айланган куьн де етти.
Ерли мектебти тамамлап, баслап Хасавюрт педагогикалык училищесинде окыган, оннан сонъ, билимин оьстируьв ниетте, Махачкалада Дагестан патшалык педагогикалык институтынынъ тарих факультетин тамамлаган. Ис аьрекетин Мавлетхан Явгайтаровна 1971-нши йылда Д.М.Шихмурзаев атындагы орта мектебинде баслайды.
Сулыплы окытувшыдынъ тербияланувшылары туьрли олимпиадаларда, конкурсларда катнасып, оьз билимлерин етимисли коьрсетип, коьп кере мектебтинъ сыйын коьтерип келгенлер. Сулыплы педагогтынъ окувшылары
тарих эм обществознание сабагыннан патшалык сынавларында белсенлик коьрсетип, берилген борышларын йогары коьрсетимлер мен толтырувы ман баскаланып келедилер. Буьгуьнлерде онынъ колында окыган окувшылары йогары окув ошакларынынъ тарих эм юридический боьликлеринде билим алып, туьрли тармакларында етимисли аьрекетлейдилер. Мавлетхан Явгайтаровна коьп йыллар бойы «Следопыт» кружогын да уьстинликли етекшилейди. Сол кружоктынъ агзалары коьп кере тувган ягынынъ тарихине багысланган «Своя игра» деген интеллектуаллык ойынында баргылы орынларынынъ иелери болганлар. Акылбалык, оьз кесписине алал, исин яны ман суьйген окытувшы тарих эм обществознание сабагы бойынша дерисиннен окытувшыларынынъ район методикалык биригуьвининъ председатели де болады. Сол секцияларында ол докладлар ман шыгып соьйлеп, ашык дерислерин, мастерклассларын эм шараларын усташа озгарып келеди. Мавлетхан Танбулатова эки выпускын яшав йолына онълаган. Коьпйыллык бир минсиз ис аьрекети уьшин бай сулыплы окытувшы «Тамада пионер-вожатый-методисти»
эм «Дагестан Республикасынынъ билимлендируьвининъ отличниги» деген сыйлы атларына тийисли этилген. Баска болып, 55 йыллар билимлендируьв тармагында коьрсеткен уьстинликлери эм оьсип келеятырган несиллерди
тербиялавда эм билим беруьвде яваплы ис аьрекети уьшин Дагестаннынъ Билимлендируьв министерствосы, Ногай район билимлендируьв боьлиги, Ногай район эм мектеб администрациялары атыннан туьрли Сый грамоталары,
Разылык хатлары ман коьп кере белгиленген. Мавлетхан Явгайтаровна оьз кесписин яны ман суьйген, ис коллективинде сый-абырай казанган окытувшы болып калмай, оьз аьвлетлерининъ, балдан таьтли уныкларынынъ, оьсип келеятырган немерелерининъ етимислерине суьйинген наьсипли ана, элли йылдан артык бактысын байлап
келген эрине алал ян косак, татым аьелдинъ куллыксуьер, берекетли уьй бийкеси. 1972-нши йыл Курманали Муса увылы ман курган аьелинде доьрт аьвлетлери: Рашида, Феруза, Ахмат эм Ренат буьгуьнлерде окытувшы кесписин сайлап, анасынынъ йолып ызлап, аьр кайсысы да элимиздинъ туьрли муьйислеринде оьз ислери бойынша етимисли каьрлеп келедилер.
Танбулатовлардынъ аьелининъ шешекейдей уныклары, айтпага, Бальбек, Фатима, Азизбек, Муса, Надир-Шах, Альберт, Альбина, Мухтар, Марат, Мария, Иса, Абдурахман эм юреклерин йылувлыкка ораган доьрт аявлы немерелери: Аиша, Али, Арина, Алия коьнъиллерин коькке дейим коьтерип, яшавларын куьезге толтырады.
Сол тувылма аьдем уьшин наьсип дегенинъ!
Узак педагогикалык йолын оьткен окытувшыга берк ден савлыкты, узак оьмирди, яшав онъайлыгын, келеекте де суьйген исинде етимислерди йорайман.
Г.Нурдинова.
Суьвретте: Мавлетхан Танбулатова.