Согыс спецоперациясы юрген ерде Кизляр районыннан оьз эрки мен кеткен ердесимиз оьз борышын йигитлерше толтырады. Янъыларда Кизляр район етекшилеви Йигитлик ордени мен савгаланган огневой демевлев куьбининъ командири Джаммал Дорушевтиннъ атыннан Разылык хатын
алды. Хатта ол Кизляр районынынъ Керликент авыл яшавшысы Шуаиб Шаибовтынъ коркынышсызлыгы эм йигерлиги акында хабарлайды.
Шуаиб Шаибов оьз эрки бойынша «Каспий» батальонына уьстимиздеги йылдынъ навруз айынынъ 5-нши куьнинде косылган. Службасынынъ биринши куьниннен алып ол коьлик айдавшы болады.
Аьскерши ердесимиз заман-заманы ман алдышылыктагы фронт линиясын керекли затлары ман канагатлайды. Онынъ оьз антына алаллыгы,
сенимлиги – баскаларга шынты уьлги. Кайсы барувында да, аьр бир шакырым ерди явдынъ оты астында оьтип, ол йогары кеспилиги мен
баскаланып калмай, Элине шынты суьйимин коьрсетип келеди. Онынъ согыс йолдасларынынъ кавыфсызлыгы, алдына салынган борышларды толтырув уьшин яшавын аямай келуьви, шынты сыйга тийисли, деп айтылады аьскершидинъ командири мен йиберилген хатта.
Район аькимбасы Аким Микиров ердесимиздинъ йигитлиги мен сукланувын ясырмай келип: «Шуаибтей аьскершилеримиз – бизим
оьктемимиз. Олардынъ коркынышсызлыгы эм баскалар уьшин янын аямавы ортак енъуьвимизге сенимликти тувдырады», – деди.
Суьвретте: Шуаиб Шаибов.