Аталыгымызды коршалавга йигитлерше турганлардынъ бактылары дайымга сыйга эм оьрметке тийисли. Ислам Сангишиев – аьдемлердинъ эслеринде аты дайымга оьмирлерге калган баьтирлердинъ бириси. СВО катнасувшысы оьз берген антына алал, терен патриотизмнинъ, коркынышсызлыктынъ белгиси болып калды.
Ислам Сангишиев, коьплеген тенълериндей болып, тынышлы яшав ман яшап, суьйикли иси мен каьрлеп, оьз мыратларын яшавга айландырып, кесписи ягыннан оьсип келген яс аьдем эди. Ама бакты оьзинше баьри затты да ерли-ери мен салды.
Элин коршаламага СВО юрген ерге бараман деген берк токтасы, онынъ савлай яшавын туьрлендирди. Ислам Абдул-Кадир увылы Сангишиев 1986-ншы йылдынъ увыт айынынъ 6-ншы куьнинде Шелков районынынъ Сары-Су ногай авылында тувып оьскен. 1992-нши йыл онынъ аьели Шешен Республикасыннан Дагестаннынъ Ногай районына коьшип келеди. Сол йылларда ол Терекли-Мектеб авыл Кадрия атындагы орта мектебине биринши класска барады. Онда ол оьзине коьп дослар тапты, биринши суьйим сезимлерин юрегиннен оьткерди, касындагыларга алал дос болып, класс етекшиси Марзиет Нурувовна Менлигулова етекшилиги мен мектеб яшавында белсенли катнасып келди. Мектебте окув йылларында оьзин куллыксуьер, талаплы, тиресуьвли, касиетли этип коьрсетти. 2003-нши йыл ерли мектебти тамамлаган сонъ, Саратов каласынынъ патшалык юридический академиясынынъ Астраханьдеги филиалында окувын бардырды. Онынъ яшавында туьрли кызыклы йоллар ашылдылар. Коьп заман кетпей, ол аьел курды, кайсы ойлаган мырадларын да яшавга айландырып келди, Астрахань, Москва калаларда куллык этти, оннан сонъ 2022-нши йыл Сургут каласында логистика компаниясын ашып, байыр коьлик пен юклер тасув ман аьрекетледи. Яшав дегенинъ оьз кезеги мен барады. Исламды билгенлер, дослары, кардаштувганлары онынъ демевлигине сенимли таянмага бир де коркпадылар.
Элин коршаламага кетпеге деп алган токтасы ястынъ яшавын савлай туьрлендирди. 2022-нши йылдынъ увыт айынынъ ишинде Владимир Владимирович Путин Украина еринде согыс спецоперациясы басланувы акында билдирди. СВО-дынъ биринши куьнлериннен алып, аьскершилеримиз элимиздинъ кавыфсызлыгын канагатлавга эм куьнсайын алдышылыкта оьз яшавын сынавга салып, Аталыгын коршалавга коьтерилдилер. Яс 2025-нши йылдынъ увыт айыннан алып оьз элининъ межелерин неонацистлерден коршаламага турды.
Исламнынъ куьшли касиетлиги, йигерлилиги, коркынышсызлыгы оьз эрки мен согыс спецоперация юрген ерге йолланганда да аян коьриндилер. Рядовой гранатометчик Ислам Сангишиев Харьков областининъ Купянский районынынъ Ивановка авыл тоьгерегин явдан босатув бойынша алдына салынган борышын толтырувда, от ишиннен оьз ийинлеринде яраланган йолдасын куткарып шыгарувда, ядырадынъ атылувыннан каты яраланады. Соьйтип, Ислам Абдул-Кадир увылы согыс спецоперация юрген ерде согыс борышын йигитлерше толтырувда, 2025-нши йылдынъ коькек айынынъ 5-нши куьнинде, яны курман болды. Сол сувык хабар Ислам Абдул-Кадир увылын билген эм ювык таныганлардынъ юрегинде терен эм битпес ярады салды. Ога бу йылдынъ увыт айынынъ 6-ншы куьнинде тек 40 яс толаяк эди.
Соьйтип, Элин оьз эрки мен коршаламага кеткен Ислам Абдул-Кадир увылы Сангишиев Аталыгы алдында яшавынынъ ызгы куьнине дейим алдына салынган борышын йигитлерше толтырды. Элин баьтир кимик коршалап, берген антына алаллыгын коьрсетти. Ол оьз яс янын бизим тынышлы келеектегимиз уьшин аямай берди.
Баьтирлер оьлмейдилер – олар бизим эсимизде дайымга яшайдылар.
Гульмира Нурдинова.
Суьвретте: Ислам Сангишиев.