Нефтекум районындагы Коясыл авылында »Тувган тил – халктынъ яны» деген шакырув астында клубында ана тилиннен дерислери берилип келетаганына коьп заман болмайды. Клуб оьз аьрекетин оьткен йылдынъ карагыс айыннан алып баслаган. Клубты ямагат аьрекетшиси, педагог Магомед Мавлимбердиевич Манкаев етекшилеп келеди. Онда балаларга ногай миллет аслары, ногай халкынынъ бай маданияты, санияты, адабияты, аьдетлери, кызыклы аьлемет туьрли оьрнеклери акында билимлерин оьстирмеге амал бериледи. Аьр дуьйсемби эм юма сонъгы куьн балалар клубка уьйкен аваслык пан ана тилден янъы билимин алмага йол аладылар.
Увыт айынынъ ишинде Коясыл авыл маданият уьйининъ куллыкшысы Ферузат Отевалиева клуб катнасувшылары ман «Мен дуныя хабаршысы, ийги
конакпан» деген йолыгыс кешлигин белгили ногай шаири, Россия Язувшылар союзынынъ агзасы, журналист, педагог Куруптурсын Утешевич Мамбетов пан
уйгынлап озгарды. Клуб катнасувшыларынынъ, язувшыдынъ тек яратувшылыгы акында билип калмай, шаирдинъ ногай эм орыс тиллеринде язган асарлары ман шаирдинъ йогары сезимде окувын да тынълап таныспага да амаллары болды. Солай болып, ол балалар ман ногай тилдинъ, йырларынынъ, анъларынынъ ярасыклыгы акында да ой сезимлери мен боьлисти. Сол куьн яс тынълавшылар кешлик йолыгысында белгили ногай шаири Куруптурсын Мамбетовтынъ ногай миллет саз алаты – домбырада усташа шертип, бир неше ногай анъларын ойнавын да уьйкен эс берип тынъладылар. Кызыклы шара «Ногай маданиятынынъ баскаланувын саклайык» деген проекти бойынша оьтти эм онынъ бас мырады оьсип келеятырган аркаларымызды миллет
маданиятына тартув, ногай халкынынъ язувшыларынынъ, шаирлерининъ яратувшылыгына суьйимди оьстируьв, оьз миллети мен оьктемситуьв болады.
Соьйтип, конъысы регионда, Коясыл авылында яшайтаган ногай балаларымызга ногай маданияты, аьдетлери, санияты, адабияты акында билимлерин
кенъейтпеге, оьз ана тилинде енъил соьйлемеге амал тувды.
Г.Нурдинова.
Суьвретте: шарадан коьринис.