Ол кишкей заманыннан алып аьскер кесписин алмага суьетаган эди. Аьли де бала шагында, Ногай шоьллигининъ Шумлелик авылындагы уьйинде турганда, Расул оьз тенълери арасында куьрес, ювырув, каргув бойынша ярыслар, согыс ойынларын уйгынламага суьетаган болган. Табиат танълыгы, оьз куьшине сенимлиги, аьдемлер мен аьллеспеге суьйимлиги эм намыс тазалыгы балаларды ога тартаган эди, эм олар оны аьр заманда да оьзлерининъ етекшиси этип сайлаганлар. Расул Гаджиалиев эр аьдем бас деп оьзин, оьз тукымын, ата юртын эм уьйкен Аталыгын сакламага керек деп санаган. Ол аьли де 2014-нши йылда, Украинада властьти бандеровшылар тартып алып, сонъында Донбасстынъ тыныш яшайтаган авыл-калаларына топлардан атып, бир куьнасиз балаларды, хатынларды, картларды оьлтирип турганда, нацистлердинъ йырткышлыгын каты айыплайтаган эди. Сонынъ уьшин де ол, 2022-нши йылдынъ басында элимиздинъ етекшилери согыс спецоперациясын баслаганда, бириншилердинъ сырасында Тувган Элин коршалавшы йигитлер санына язылды.

Расул Гаджиалиев эки ай узагында Шешен Республикасынынъ Шали каласындагы Россия спецназ университетининъ базасында согыс кесписине уьйренуьвлерди оьтти. Сонынъ акында сол заман уьйиндегилери бир зат та билмегенлер. Уьйренуьвлер кутылган сонъ, ол тек тувганларына тезден СВО-га оьз ыхтыяры ман кетееги акында айтты. «Кайтип?.. Солай да тез бе?» – деп сорады уьйдеги анасы, коьз яслары арасыннан оьзининъ увылынынъ бактысы акында навасызланып. «Аьли де бираз заманга сама уьйде турмага ярамайма?» – деп тиледи яс хатыны. «Сен оьзинънинъ аьелинъ, балаларынъ акында да ойламага керексинъ», – деген насихатын берди агасы. Тек атасы, коьзлерин тоьмен салып, уьндемеди, неге десе Расул оьзининъ берген соьзиннен кери кайтпаягын ол аьруьв билетаган эди. Увылы болса Донбасстынъ яшавшыларына коьмек этпеге эм олар уьшин явдан оьш алмага деп алгасап турды. Соьйтип 2022-нши йылдынъ декабрь айында Расул Гаджиалиев «Ахмат сила» деген спецназ отрядынынъ сырасында Луганск бетлерге йолланады.
Сол куьнлерде бу якларда кан тоьгисли авыр согыслар юрип туры эди. Сондай ялынлы куьнлердинъ бирисинде согыс тапшырмасын толтырып турган аьсеринде Расул анъсыздан тасада ясырынган явдынъ минасына аягын басты. Соннан ол эки кайтып турмады… Бу ис 2023-нши йылдынъ 2-нши февралинде болды. Сол заман ол артына кайтып аман калмага да болаяк эди, ама бир заман да кери тайып уьйренмегеннен себеп алдыга абытлады.
Атасы Гаджиалидинъ ойы 100 процентке дурыс эди: Расул оьзининъ берген соьзиннен бир абытка да кери таймады, Тувган Элине кыйынлык келгенде, оьзининъ яс янын аямай оны коршалады.
… Ногай шоьллигине тагы да кайтып язлык келди. Тувган якларда тагы да яркырап куьн куьлемсирейди, бийикте бозторгайлар сарнайдылар, ясыл оьленлер мен биринши шешекейлер кенъ данъылды бийлегенлер. Койшылар да, йылы куьнлерге суьйинип, койларын отлакларга кенъ яядылар, балалар эртерек мектебке барадылар, авыл яшавшылары оьзлерининъ тынышлы ис каьрлерин шегедилер. Тек бу сондай тынышлык уьшин туьнегуьнлерде согыс спецоперациясынынъ кайнаган ерлеринде мунда, тылда, бирев де ян бермесин деп бизим баьтир ясларымыз оьз янларын бергенлер. Буьгуьнги язлык эм уьстимиздеги тап-таза парахатлы коьгимиз – солар бизим уьйкен ярасык элимизде оьмир-оьмирлерге яшав яйнап турсын деп буьгуьнлерде оьз аркалары ман бизим баьримизди де ябып, алдыга баратаган аьскершилердинъ йигитлиги мен тувра байланыслы.
М-А.Ханов.
Суьвретте: Расул Гаджиалиев.