Биз Аталыгымыздынъ коршалавында турганлардынь эм оларды коьтергишлейтаганлардынъ аьр кайсысы ман да дайым оьктемсиймиз. Авыр шакта оьз эли эм халкынынъ касында болув, ортак иске ярдамын косув – ол буьгуьнлерде аьскершилеримиз коьрсетип келетаган шынты патриотизм болады. Буьгуьнлерде согыс спецоперация юрген ерде аьскершилер эм офицерлер авыр службасын толтырып келедилер. Салынган борышларды йогары оьлшемде толтырар уьшин гражданларымыздынъ коьтергишлеви эм гуманитарлык ярдамын йыювы бек маьнели. Янлары авырыган аьдемлер согыс спецоперация еринде алдышылыкта
болган аьскершилеримизди коьтергишлев мырадта гуманитарлык ярдамын этуьвде бирлесип келедилер. Янъыларда Нефтекум районынынъ Коясыл авылында маьнели оьзгерис болып озды. Сол шарага айырым маьнелигин Херсон областиннен келген аьскершилери де костылар.
Сол куьн «Биз бирге болсак – куьшли! Биз бирге болганда – енъилмеймиз!» деген шакырув астында яны авырыган волонтерлар эм имамлар ман согыс спецоперацияда ортакшылык этетаган аьскершилеримизге гуманитарлык юги йиберилди. Сондай гуманитарлык ярдамы Ставрополь крайынынъ муфтийининъ биринши орынбасары Фаизрахман хаджи Эсеновтынъ демевлиги аркалы Нефтекум районынынъ авыл имамларынынь баславы ман уйгынланган эди.
Сол тийисли баславды «Бирлик – Единство» куьби коьтергишледи эм уьстимиздеги йылдынъ казан айынынъ басында «Утеплим бойцов» деген акциясын уйгынлады. Уьш юма ишинде СВО еринде болган йигитлеримизге керекли йылы кийимлери йыйылдылар. Коясыл авылыннан «Своих не бросаем», Махмуд-Мектеб авылыннан «Мы за Победу», Тукуй-Мектебтен «БирликЕдинство» волонтерлык куьплери сол акция катнасувшылары болдылар. Тамамында аьскершилерге явдан ясырынув уьшин
27 шилтерлери, окоп майшыраклар, йылы шораплар, ювырканлар, азык-туьлик, баска болып, алдышылыкта турган аьскершилерге баска керекли затлары да аьзирлендилер. Гуманитарлык югин йибереектинъ алдында Ставрополь крайынынь муфтийининъ биринши орынбасары Фаизрахман хаджи Эсенов гуманитарлык ярдамын йыювда катнаскан баьрисине де разылыгын билдирди. Оьз соьйлевинде ол Нефтекум район авыллар имамлары ман бирге алдышылыктагы аьскершилермизге блиндажлар курув уьшин такта, фанера, йылувды ыслав алатларын эм шилтерлерин алганларын билдирди.
Фаизрахман хаджи Эсеновтынъ белгилеви мен, имамлар ман алдышылыктагы коршалавшыларымызга гуманитарлык юги биринши кере йиберилмейди. Имамлар волонтерлар ман бирге согыс спецоперация катнасувшыларына олар ярдамды йыювда эм йиберуьв бойынша исин келеекте де бардыраягына берк сенимин билдирди. Оьз соьзин Эсенов «Енъуьв бизики болаяк» деген соьзлери мен тамамлады. Йыйылган имамлар эм волонтерлар гуманитарлык югин келген «КАМАЗ» автокоьлигине
тиедилер эм йылы йоравлары ман аьскершилерди йолга салдылар.
Аьр кайсымыздынъ да ярдамымыз – ол тек коьтергишлев тувыл, ол бизим аьскершилеримиз уьшин согыс урысларында алдына салынган борышларын толтырмага эм оларды уьйлеринде суьйип, аьсиретли саклайтаганын, демевлик этетаганды эсине салган уьйкен моральли куьш болатаганына шек йок.
Г.Нурдинова.
Суьвретте: гуманитарлык югин йиберуьв мезгили.
