Терекли-Мектеб авылынынъ Кадрия атындагы мектебининъ негизинде (шара озгарылган ер – Халк яратувшылык орталыгы) бек салдарлы шара болып оьтти. Бу куьнги шара РФ Президенти мен белгиленген – Бирлик йылынынъ ашылувына багысланган эди. Ол – юректинъ терен сезимлерин козгаган, несиллерди бириктирген, сыйлавга эм сенимлерге толган кешлик.
Бу куьн мектеб босагасыннан абытлап тек окувшылар тувыл, баскалай, конак болган аьдемлер, аьлиги заманнынъ тарихинде атлары болган, бактыларында согыс спецоперациясы орын туткан эм сонынъ куьллесине куьйгенлер кирдилер.
Шара конаклары – бу куьнлерде Аталыктынъ япсарларын явдан куткарувшы СВО катнасувшылары, солай ок, «йигитлик» деген тек соьз болып калмай, байыр кайгысы эм оьктемлиги болган аьдемлер – СВО барысында баьтирлерше ян берген аьскершилердинъ ата-аналары, хатынлары, балалары, ювыклары эдилер. Сол санда Россия Федерациясынынъ Баьтири Шамиль Набибуллагович Магомедовтынъ атасы да бар эди.
Эндиги РФ Баьтири Шамиль Магомедовтынъ аты да Кадрия атындагы мектебининъ тарихине кирди, онынъ атына Баьтир партасы мунда ашылды. Сол ыхтыяр онынъ атасы ман музей етекшиси Марина Межитовага берилди.
Набибуллаг Магомедов йыйылганларга юрек авырувы ман, коьзясы ман оьзининъ увылынынъ баьтирлиги акында хабарлады, бу куьн оны йылы йолыккан мектеб етекшилерине, окувшыларына оьзининъ разылыгын билдирди.
Онынъ хабарлавыннан йыйылганлар Магомедовлардынъ бу тукымыннан уьш увылы да согыс спецоперациясында ортакшылык этетаганын билдилер: Шамиль – РФ
Баьтири, экеви – Йигитлик орденининъ иелери. Конаклар шара барысында юритуьвшилер – окытувшы Динара Заргишиевадынъ, окувшы, СВО катнасувшысынынъ увылы Рашид Акимовтынъ соьйлевиннен коьп кызыклы билдируьвлер эситтилер.
Келген конакларга хош келди соьзин мектеб етекшиси, ДР ат казанган окытувшысы, СВО катнасувшысынынъ хатыны Альфия Акимова, Халктынъ бирлиги мине сосындай аьллерден – тарихти, ясуьйкенди сыйлавдан, бу куьнлерде колларына савыт алып, Аталыкты, Элди явдан саклавдан басланатаганын айтты.
Шара барысында Ногай район Депутатлар йыйынынынъ председатели Алибек Менласанов, Согыс, ис эм ыхтыярсаклав органларынынъ ветеранлар советининъ председатели Акманбет Сангишиев, ДР Халк Йыйынынынъ депутаты Ш.Омаровтынъ региональлик коьмекшиси, волонтер Жанна Мусаева шыгып соьйледилер. Аьр кайсысы да оьз разылыгын билдирди – баслап, СВО катнасувшыларына, сонъ – шара уйгынлавшыларга. Бу куьн йыйылганларга окувшылардынъ катнасувы ман миллет биюви де коьрсетилди, ятлав да айтылды.
ДР ат казанган артисти Зульфия Аджигеримовадынъ йырлавында «Встанем» деген йырдынъ занъыравы юректинъ энъ де туьбинде болган сезимлерин козгады. Оны
СВО катнасувшылардынъ «Оьлимсиз полкы» курсап алдылар. Ногай ясларымыз – баьтирлерше ян бергенлердинъ суьвретлери… Аьр бириси оларга багысланып этилген
эстелик шарасына карады, суьйдимли, яйнаган коьзлери мен…
Баьтирлер, йок олар – оьлмегенлер, бизим араларымызда, эслеримизде дайымларга.
Бу куьн Кадрия атындагы мектебининъ окытувшылары эм окувшылары ман уйгынланган шара тыпаклыкты, бирликти коьрсетти. Бирлик йылы – тек тавыслав соьз биригуьви тувыл, йылдынъ – белгиси. Сол бизге Элимиз алдында алал болувды, буьтин болып, явды енъмеге болатаганымыз акында эсимизге салув болады.
Г.Сагиндикова.
Суьвретте: шара мезгилинде.