Согыс спецоперациясы акында айтылса, коьз алдымызга йигитлеримиз келеди. Коьп яслардынъ акында язылды, биревлери, оькинишке, арамызда йок, болса да олар дайымларга бизим юреклеримизде эм эсимизде. Олардынъ ишинде – меним ердесим Арифулла Байрамов. Ол йигитлерше согыскан эм ян берген Эли, Аталыгы уьшин. Онынъ йолын бардырып, аьлиги заманда СВО еринде онынъ акасы, Уйсалган авылынынъ яшавшысы Тагир Толевхан увылы Байрамов (позывнойы «Байрам») катнасады. 2023-нши йылдынъ сары тамбыз айыннан алып Тахир Байрамов яман явды согып, еримизди босатады. Тагир Уйсалган авылында Толевхан эм Нуржамал Байрамовлардынъ коьп балалы аьелинде тувып-оьскен. Баслапкы классларда авылда окыган, сонъ атаанасы ман Воронежская областининъ Гаврильское авылына коьшкен, окувын сонда битирген.

Окув йылларында Тагир бек нызамлы, билимге ымтылган бала болган. Кишкейден алып спорт пан каьрлеген. Окувын кутарып, эр борышын толтырмага Московская областининъ Наро-Фоминск каласына кеткен. Мунда Таманская дивизиясында биринши мотострелковый полкта куллык эткен.
Сол йылларда алган сулып Тагирге бек керекти келеекте. Эки йылдынъ ишинде онынъ ата-анасы боьлик етекшилевиннен коьплеген разылык хатлар алган.
Оьз борышын ийги толтырганы эм нызамы уьшин Тагир Байрамов йолдаслары арасында сый-абырай казанган.
Аьлиги заманда Тагир Луганск областинде согыс связист болып куллык этеди, оннан алды Херсон областинде аьрекет эткен. Тагир аьлейи мен увылын тербиялайды.
– Аьр бир инсаннынъ, оьз элининъ патриотынынъ, эр кисидинъ бас борышы – Аталыгын саклав. Баьриси де бизге сенедилер – тувганларымыз, аьеллеримиз, аьвлетлеримиз. Биз таза аспан уьшин согысамыз. Мен иним Арифулла ман оьктемсиймен, биз оны дайым эсимизде саклаймыз. Бизим исимиз дурыс, онъ, соны уьшин бизим енъуьв алдыда.
Биз енъермиз, неге десе Аталыгымыз уьшин ян бергенлерге ант эткенмиз, – деп айтады ердесимиз. Шынты эр кисидинъ соьзлери. Сондай йигитлеримиз Аталыкты саклавда турса, енъуьв бизики болар.
Г.Бекмуратова.
Суьвретте: Т.Байрамов.