Савлайроссиялык «Классные встречи» проекти бойынша эм оьсип келеяткан несилди патриотлык яктан тербиялав мыратта, А-Х.Джанибеков атындагы мектебинде
СВО катнасувшысы Фарух Ибрагимов пан йолыгыс оьтти. Бу куьнлерде йигит кыска болжаллы тыншаювда эм оьзи окыган мектебке окувшылар ман эскеруьвлери мен боьлиспеге, оларга согыс спецоперация озаяткан ердеги куьнлер эм туьнлер акында хабарламага шакырылды. Бесинши класс окувшыларынынъ сыйлы конак пан йолыгысын олардынъ класс етекшиси Лейла Сагиндикова ашты. Ол бизим заманнынъ баьтирин хошлаятып, мундай шаралар окувшыларда Эли
уьшин оьктемлик сезимин беркитпеге эм Аталык коршалавшылар ман бетке бет коьрисип аьллеспеге амал беретаганын белгиледи.
– Россия оьз баьтирлери мен данъклы. Олар кайсы заманларда да, Элин коршалавга турмага, онынъ уьшин янын да бермеге аьзир болганлар. Бу куьнлерде СВО
катнасувшылары Уллы Аталык согысынынъ ветеранларынынъ исин бардырадылар, олар да атайларымыздай болып нацистлерди согадылар, савдуныядагы тынышлыкты коршалайдылар. Сиз, балалар, баьтирердеслеримизди билмеге, олардынъ йигитликлери мен оьктемсимеге тийислисиз, – деди окытувшы.
Фарух Ибрагимов окувшыларга Россия Президенти Владимир Путин согыс спецоперациясын баслав бойынша карар алувынынъ себеплери, оьзининъ биринши сынавлары, аьскершилик аьзирленуьви акында хабарлады.
– Тувган Эл – бизде бирев, оны коршалав аьр бир эр кисидинъ киели борышы. Аьр бир эр киси аьскер службасын да оьтуьв керек. Эл коршалавшы тек куьш-куватлы,
коркынышсыз, шыдамлы болып калмай, яваплылы эм намыслы болмага керек. Ол оьз Элин, тувган ерин, уьйин, ювыкларын суьймеге эм бааламага тийисли, аьне соннан Эл басланады. Явды сокпага бизге Енъуьвге сеним, ердеслеримиздинъ эм кардаштувганлардынъ коьтергишлеви эм тынышлык уьшин куьресуьвимиз коьмек этеди, – деди СВО катнасувшысы.
Тагы да ол балаларды окытувшылар, ата-аналар айтканды ерге туьсирмей, тынъламага, ийги окымага, спорт пан каьр шекпеге, оьрленмеге эм алдыга салган мыратларга етиспеге шакырды.
Йолыгыс бек йылы аьлде оьтти, балалар дерис кайтип ызына ювыклаганын да сезбей калдылар эм бизим заманнынъ баьтири мен аманласпага алгасамадылар.
Лейла Делибиевна СВО катнасувшысына заман тавып келип, оьзининъ тыныш болмаган аьскер яшавы ман боьлискени, эрклиги эм коркынышсызлыгы уьшин уьйкен разылыгын билдирди. Фарух Ибрагимов окувшылар ман йолыгысувдан оьзгелей, юма сайын озгарылатаган линейкада катнасты, ога Россия патшалык байрагын коьтермеге сыйлы ыхтыяр берилди.
Нурият Кожаева.
Суьвретте: йолыгыстан коьринис.