Танъла, 1-нши сентябрьде, Дагестан еринде шатлыклы аьлде 28 билимлендируьв учреждениелер – 15 мектеблер эм 13 балалар бавлары ашылаяк. Онынъ акында билимлендируьв куллыкшыларынынъ август айында озгарылатаган кенъесинде ДР Аькимбасы Сергей Меликов билдирди. 

Йылдынъ ызына дейим 40 мектеблер курылысы тамамланаяк. Оннан баскалай, бу йылда 139 мектеблерде капиталлык ярастырув куллыклар этилинген. – Кулланувга беруьв эм капиталлык ярастырув куллыклар озгарув бойынша коьрсеткишлер бизде Россия бойынша энъ йогары коьрсеткишлердинъ бириси. Эм эгер куллык юритуьв шугыллыгы соьйтип сакланса, бу тармакта аьл ювыктагы келеекте сапатлы туьрленеек ийги якка карап, – деп белгиледи республика етекшиси.

Сергей Меликов авариялык аьллердеги мектеблер маьселелери план бойынша шешилеегин билдирди, киши комплектли мектеблер балалары уьшин район орталыкларында интернат учреждениелерин туьзуьв соравы да каралатаганы акында айтты.