2025-нши йылдынъ 15-нши июнинде патшалык эм ямагат аьрекетшиси, Дагестан Республикасынынъ Государстволык Советининъ сыйлы Председатели, Россия Федерациясынынъ Баьтири Магомедали Магомедовка 95 яс толаяк эди. Дагестаннынъ шынты патриотынынъ сыйына Махачкаладынъ орталык орамында эстелик ашылды, «Дагестаннынъ оьктемлиги» эскеруьвлер китабининъ презентациясы оьтти, а оннан сонъ Магомедали Магомедовтынъ тувган Леваши районында эстеликли шаралар озгарылдылар.
Дагестаннынъ эм Россиядынъ кызыксынувларын Магомедали Магомедов дайым да баьри заттан да йогары салатаган болган. Айтканында каты турып, талаплавларга коьре, баьри соравлардынъ шешилуьв йолын тавып бажарган. Эш бир янъылыссыз болаяткан заттынъ туьп маьнелигин айырып билген, куьрессиз енъип эм эрислеспей айтканын еткерип бажарган. Онынъ соьз усталыгы эм аьдемлер мен кызыксынып, олардынъ сезимлерине эм навасызланувларына артык маьне беруьви Дагестаннынъ тарих бетлеринде коьплеген сонъгы несиллер уьшин уллы патшалык аьрекетшисининъ атын оьмирлетти. Дагестан политикасынынъ аксакалы Магомедали Магомедов, республикада болатаган баьри зат уьшин толайысы яваплылыкты оьзине алып, элимиз уьшин баьри пайдалы затка ашык болып кала берип, сайланган йол ман эркли эм кескинли бармага керегин коьрсеткен. Бу яктан ол бизге уьйкен коьрим эди.
– Мен Магомедали Магомедов пан байыр таныс болганыма оьз бактыма разыман. Ол дайым да оьз сулыбы ман боьлискен, аян карарлар алувга ийтемей, энъ бас затка – аьдемлер мен аьллесип, Дагестанды суьйип уьйреткен.
Аьдемнинъ яшавдан тайганы онынъ йолы тамамлаганды анълатпайды. Магомедали, онынъ акында эс, онынъ эткен ислери эм ой-токтаслары айтылган шаклы, тири. Бизим сыйлы ердесимиздинъ республикадынъ оьрленуьвине, дагестан еринде тынышлыкты эм онъайлыкты канагатлав исине эткен косымын бир де мутпаякпыз, – деди Дагестан етекшиси Сергей Меликов.
Магомедали Магомедовтынъ 95 йыллыгынынъ сыйына эстелик ашылув ман байланыслы шара катнасувшыларына Россия Президенти Владимир Путин хошлав язбасын йиберген. Оны йыйылганлар алдында Сырт-Кавказ Федераллык округында РФ Президентининъ толы ыхтыярлы ваькили Юрий Чайка окып эситтирди.
– Магомедали Магомедовтынъ савлай яшавы Дагестан ман берк эм кардашлык байланыста озды. Мунда ол уьйкен ис йолын оьтти, тувган ерин ак юректен суьйген, ердеслерининъ онъайлыгы уьшин кыйын салган коьрнекли етекши эсабында куллык этти. Эм, оьзек те, белгилер эдим онынъ тоьмендеги касиет белгилерин: Сырт Кавказ эм савлай Россия уьшин авыр сынавлар туьскен заманында коьрсеткен йигитлигин эм каты турыслыгын, республикада тынышлыкты эм макулласувды беркитуьвге, элимиздинъ территориальлик суверенитетин саклавга онынъ эткен уьйкен косымын. Сондай маьнели мерекели оьзгерис сыйына Дагестаннынъ бас каласында Магомедали Магомедовка – зейинли, бир де енъилмейтаган касиетли аьдемге, шынты патриотка эм гражданинге эстелик ашылганнынъ уьйкен терен белгиси бар. Магомедали Магомедов акында эс бизим юреклерде дайымга калар, – деди Россия Президенти.
Солай ок бу шатлыклы шарада Россия Оькиметининъ алдынгы председатели, «Фонд развития территорий» попечительлик советининъ председатели Сергей Степашин, РФ Президенти Администрациясынынъ етекшисининъ орынбасары Магомедсалам Магомедов шыгып соьйледилер. Магомедсалам Магомедов атасынынъ эстелигине аявлы карав ман уьйкен эс каратылганы уьшин ак юректен оьз разылыгын билдирди.
