Дагестан Республикасынынъ Оькиметининъ Председателининъ орынбасары Ризван Газимагомедов янъыларда Ногай районында конакта болып кетти. Сонынъ акында район администрациясынынъ пресс-службасы билдиреди.
Вице-премьер Ризван Газимагомедов Ногай районына ис йорыгы ман келген эм гражданларды кабыл эткен. Район аькимбасы Джамалутдин Эсиргепов
уйгынлаган эм оьзи де ортакшылык эткен бу шара власть пен халк арасында етимисли хабарласув уьшин ийги майдан болды.
Район яшавшылары республика Оькиметининъ Председателининъ орынбасарына оьзлерининъ соравлары эм маьселелери мен йолыкпага амал таптылар. Ризван Газимагомедов пан бирге келген «Дагестанавтодор» ГКУ етекшиси Рустам Закариев эм онынъ орынбасары Замир Умаханов ерли аьдемлер мен
район йол инфраструктурасын оьрлентуьв соравларын ойластылар. Яшавшылар авыллар аралыгындагы йоллардынъ аьллери акында айттылар. Вице-премьер
Р.Газимагомедов йолларды ярастырув эм курув соравлары дайым да республика власть органларынынъ тергеви астында турадылар деп белгиледи, неге десе
сапатлы йоллар билимлендируьв эм медицина учреждениелерине етисуьвди канагатлайтаган маьнели фактор деп саналадылар эм соны ман бирге бизнес пен авыл хозяйство тармакларын оьрлентуьвге себеп боладылар.
Кара-Су авыл яшавшысы, согыс спецоперациясынынъ катнасувшысы Вагаб Османов Терекли-Мектеб – Кара-Су – Кумлы авыллары аралыгындагы автомобиль йолын ярастырув акында тилек этти. Солай ок ол Ногай эм Тарумов районларынынъ военкоматы бизим районнан эрек орынласувы акында соравды да козгады. Онынъ ойы ман, район ериннен военкоматка дейим заьлимдей уьйкен йол аралыгы СВО катнасувшыларынынъ аьеллерине сонда етисуьв уьшин кайбир кыйынлыклар тувдырады.
Район яшавшылары язгы район балалар лагерин кайтадан тургызбага, билимлендируьв эм нейрокоррекция орталыгын оьрлентуьвге ярдам этуьв кереги акында тилек эттилер. Вице-премьер Р.Газимагомедов айтылган маьселелердинъ, балалар лагерининъ социаллык маьнелигин эм аутизм мен авырыйтаган балаларды билимлендируьвге айырым эс бермеге керегин белгиледи.
Нариман авылдынъ А.Асанов атындагы орта мектебининъ директоры Байрамбийке Тенгизова Терекли-Мектеб – Нариман авыллары аралыгындагы автойолды ярыклатув кереги акында соравды коьтерди. ТереклиМектеб авылынынъ Кадрия атындагы орта мектебининъ директоры, депутат Альфия Акимова вице-премьерге янъы билимлендируьв учреждениесин курув акында сорав берди. Ол аьлиги мектеб меканына тезден 111 йыл толаягын эм сонынъ аьли заман
талаплавларына келиспейтаганы акында хабарлады. Ризван Газимагомедов сол куьн ок та Кадрия атындагы мектебке барды, классларды карап шыкты, окувшылар ман хабарласты, мектебтинъ асханасынынъ аьллери мен танысты эм меканнынъ тыскы фасадынынъ аьлин тергеди.
Вице-премьер яшавшылардынъ баьри айтылган соравларын эм маьселелерди оьзининъ байыр тергеви астына язып алды эм соларды шешуьвге ярдам этеегин билдирди.
