Дагестан Республикасынынъ Ногай районынынъ администрациясында СВО еринде баьтирлерше согысып, ян берген ердесимиз Расул Лукмановтынъ ювыкларына «За отвагу» медалин тапшырдылар.
Расул Лукманов Ленинаулда тувып оьскен, ол Россия Савытлы куьшлери мен контракт туьзип, согыс спецоперация ерине яв ман куьреспеге кеткен.
Оьлгеннен сонъ онынъ йигерлигин, йигитлигин йогары патшалык савгасы ман белгиледилер. Район аькимбасы Джамалутдин Эсиргепов эм Ногай,
Тарумов районларынынъ военный комиссары Ваха Хадисов баьтирдинъ анасы Фаризат Лукмановага «За отвагу» медалин тапшырдылар. Шарада
Расулдынъ ювыклары катнастылар, сондай кыйынлы заманда олар Фаризат Вахбий кызын коьтергишлемеге келдилер.
Лукмановлардынъ аьелине бассавлык соьзлерин Ногай районынынъ аькимбасынынъ орынбасары Мурат Шадиев, Ногай районынынъ Депуталар йыйынынынъ председатели Алибек Менласанов, «Яслык» яслар орталыгынынъ директоры Абибулла Шамбилов эм баскалар айттылар. Аьр аьдем Расул Лукмановты эсине ийги соьзлер мен алдылар, ол намыслы, аьдил, йигерли эр киси болган.
Терекли-Мектеб авылында Кадрия атындагы парктынъ еринде «Эс бавында» Расул Лукмановтынъ атыннан терек шашылаяк. Ердесимиз яшаган уьйде тез арада мемориаллык такта салынаяк.
– Биз Аталыгымыз уьшин янларын берген йигитлеримизди эсимизде дайымларга сакламага керекпиз. Расул Лукмановтынъ баьтирлиги – бизге эм келеектеги несилге йигитликтинъ коьрими, – деп белгиледи Д.Эсиргепов.
Район администрациясы Расул Лукмановтынъ аьелине бассавлык билдиреди. Онынъ аты дайымларга Ногай районынынъ тарихинде шынты баьтирдинъ аты болып калаяк.
З.Ваисова.