Эмлеген врачтан авырыган аьдем аьлеметликти куьтеди, сога коьре кайдай кыйын эм сеним болмаган аьллерде де, сонынъ уьшин врач сол зат болаягына ынандырып болув керек. Ногай район орталык больницасынынъ врач-онкологы Маржанат Теминова, авыр маразды енъуьвде баьри куьшин, билимин эм аьдемшилигин кулланып, аьр биревдинъ юрегинде тек сенимлик тувдырып калмайды.
Маржанат Зауровна Сургут каласындагы патшалык университетининъ медицина факультетин кызыл дипломга кутарган сонъ, Москва каласында РФ Савлык саклав министерствосынынъ Н.Блохин атындагы онкологиядынъ миллет медицина тергев орталыгында ординатурады оьткен. Сонъ яс кыз бу орталыктынъ химия-терапия боьлигинде ислеген. Сонда ол аьлиги заманда онкологиядынъ окытувшылары, мараздынъ шешуьв йорыкларын тергеп-излейтаган, Россиядынъ айтылган врачлары колларында билимин оьстиреди эм сулып йыйнап, тувган Ногай шоьлине кайтады. Яс врачтынъ билимин терен этпеге аьллер коьп элимиздинъ бас каласында ислемеге де амалы болды, ога окытувшылары да сондай маслагат бердилер, ама ногай кыз оьз тувган еринде пайда аькелмеге суьйди. Мине аьли неше йылдан бери ол, районымызда авыр мараз бан
куьресип, хирургия-операция эм химия-терапия оьткенлерге оьзлерин осал сезбеске, аста-акырын куьш йыйнамага коьмек этеди.
Маржанат Зауровна 2022-нши йыл Уьзилгисиз кеспи билимлендируьвининъ Россия медицина академиясында (РМАНПО) билимин оьстирип, балалар -онкологы сертификатын да алган.
Авыр мараз ясты сорамайды, оькинишке, балаларды да ол аямайды. Бу куьнлерде оьз иси мен бирге врач-онколог уйгынлав-методикалык куллыгы бойынша бас врачтынъ орынбасарынынъ куллыгын да кесек заманга юритеди. Маржанат Теминовадынъ ийги иси ДР Савлык саклав министерствосынынъ Сый грамотасы ман белгиленген.
Маржанат медицина йылдан-йылга алдыга баратаганын белгилеп, авыр маразлылар сырасында оны енъгенлер аз тувыл экенин кайтакайта айтады. Ол аьдемлерди заман-заманы ман, айлак та болмаса, йылда бир кере сама, авырувларды аянламага амал беретаган диспансеризацияды оьтпеге маслагатлайды. Сонынъ акында бизге язбага тилек салып, баьри де окып, эситип, оьз савлыгы акында ойланарлар деп сенеди.
Маржанат пан аьллескен сайын, онынъ авырувды енъуьвдинъ, аьдемлерге ярдамласувдынъ акында куллыктан сонъ да, бир такыйкага да мутпайтаганын тагы да анълайман.
Нурият Кожаева.
Суьвретте: Маржанат Теминова.