Янъыларда Ногай район администрациясында Депутатлар йыйынынынъ 8-нши сессиясы болып озды. Шарада «Ногайский район» МР аькимбасы Джамалутдин Эсиргепов, район Депутатлар Йыйынынынъ председатели Алибек Менласанов, район депутатлары, актив ваькиллери, авыл поселениелер аькимбаслары, ямагатшылар ортакшылык эттилер.

Ис куьнделигинде тоьмендеги соравлар каралды:
1. «Ногайский район» МР аькимбасынынъ 2025-нши йылында этилген ислер акында эсап беруьви;
2. «Ногайское РСУ» АО филиалынынъ директоры Джамбулат Караевтинъ 2025-нши йылда этилген ислер акында эсап беруьви;
3. «Ногайский район» МР еринде ямагат эм дин тутылатаган оьликлердинъ аьрекетининъ йорыгы эм оьлилер коьмилетаган ерлерди саклав йосыклары
акында Положениеди токтастырув;
4. Туьрли соравлар. Район аькимбасы Джамалутдин Эсиргепов, 2025-нши йылда «Ногайский район» МР-нынъ социалэкономикалык оьрленуьви акында эсап беруьви мен шыгып соьйлеп, бас коьрсеткишлер бойынша ийги як сырагыларга етисилгенди белгиледи:

– авыл хозяйствосынынъ валовой продукциясынынъ оьлшеми – 5 млрд 563 млн. маьнет;
– бас капиталга инвестициялар – 2 млрд 257 млн маьнет;
– турак уьйлерди кулланувга беруьв эм инфраструктурасынынъ оьрленуьви.
Айырым маьне берилди миллет проектлерининъ эм республикалык программалардынъ яшавга шыгарылувына:
– Батыр-Мурза авылында 100 орынга эсапланган мектебтинъ курылысы;
– А.Ш.Джанибеков атындагы Терекли-Мектеб орта мектебининъ капиталлык ремонты (баасы – 99 млн маьнет акша);
– Терекли-Мектеб авыл скверин ярастырув;
– Кумлы эм Карагас авылларында орамларга асфальт тоьсев;
– Терекли-Мектев авылынынъ «Айсылу» эм «Юлдыз» балалар бавларына ремонт этуьв.
Сонъ депутатлар алдында «Ногайское РСУ» АО филиалынынъ директоры Джамбулат Караев эм уьшинши сорав бойынша анълатувлары ман Алибек
Менласанов шыгып соьйледилер.
Сессия катнасувшылары оьликлерди саклав эм кулланув акында янъы Положениеди беркиттилер. Хасавюрт районынынъ авыр табият аьллеринде сув
алувдан кыйынлык коьрген яшавшыларга этилген гуманитарлык коьмек акында эсап беруьви мен Зухра Аджиманбетова шыгып соьйледи.
Сессия барысында район етекшиси Джамалутдин Эсиргепов Архитектура эм ЖКХ боьлигининъ начальниги Алибек Муллаевке коьпйыллык эм намыслы кулык этуьви уьшин «Дагестан Республикасынынъ тураккоммуналлык хозяйствосынынъ сыйлы куллыкшысы» деген атка тийисли этилгени акында шайытламасын тапшырды.
«Ногайский район» МР администрациясы депутатларга, авыл поселениелер етекшилерине эм ямагатшыларга конструктивлик иси эм еримиздинъ оьрленуьвининъ актуальли борышларын шешуьвге аьзирликлери уьшин разылыгын билдиреди.