Оьткен юма ызында ДР Аькимбасы Сергей Меликовтынъ баславы ман Махачкалада согыс спецоперация катнасувшыларын бирлестиретаган «Бизим заманнынъ баьтирлери» деп аталган конференция оьз исин баслады. Пленарлык кенъес барысында Сергей Меликов аьскершилерге баьри дережелерде де туьрли як колтыклавдынъ кереклигин айырым белгиледи.
Конференцияда Ногай район етекшиси Джамалутдин Эсиргеповтынъ басшылыгы астында тоьмендеги сырасы ман бизим делегация да ортакшылык этти: КЦСОН директоры Хамидулла Саитов, УСЗН директоры Багаутдин Тангатаров, СВО ветераны, «Память гор» СВО ветеранлар Ассоциациясынынъ председатели Вагаб Османов, солай ок СВО катнасувшылары Рустам Магомедов эм Рустам Мустафаев Ызлы-ызыннан уьш йыл бойы озгарылатаган бу форум СВО катнасувшылары, олардынъ ювыклары, власть органлар ваькиллери эм ямагат ара тувра диалог туьзуьвде маьнели майдан эсабында ийги як себеплигин тийгистеди.
Джамалутдин Эсиргепов, конференцияда оьз катнасувы акында боьлисе берип, мундай шаралар озгарувдынъ республикалык эм муниципаллык дережелерде куьш салувды онълавда уьйкен маьнелиги барын белгиледи. Онынъ соьзлери мен, СВО катнасувшыларга коьмек кереклиги акында тек айтып турмай, аьдемлерге шынтылай да коьмегин тийгистетаган аян карарлар кабыл этип алып, яшавга шыгармага керегин белгиледи. Тематикалык секцияларда аьскершилердинъ туьзилген социаллык аьллерде яшавга кирисетаганнынъ, олардынъ аьеллерин яклав шаралардынъ эм куллыкка туьсуьвдинъ ийги деген практикаларына эс беруьв планланады.
Конференцияда, туьрли тематикалык йолларга маьне берилип, олар секциялар эсабында кенъ аьлинде каралды. Эс каратувдынъ ортасында – социаллык коршалав эм льготаларга тийисли этуьв, медициналык канагатлав эм реабилитация, солай ок билимлендируьв программалар эм кеспилик билим алув ман
байланыслы соравлар. Оннан баска болып, куллыкка туьсуьв эм предпринимательстводы оьрлендируьв, солай ок психологиялык яклав эм адаптация соравлары ортага салынып каралды.
Зухра Ваисова.