Йыл сайын казан айынынъ 1-нши куьнинде элимиз бойынша Халклар ара ясуьйкенлер куьнининъ байрамы кенъ белгиленип келуьви аьдетке кирген. Савлай ямагат уьшин сол байрамнынъ уьйкен маьнеси бар. Сол куьн биз ясуьйкен несилине, элимиздинъ байлыгын курып эм оны арттырып келгенлери, ясларына да карамай аьвлетлерин, уныкларын намыслы оьстирип, тербиялап келгенлери уьшин уьйкен разылык соьзлерин багыслаймыз. Олардынъ коьбиси буьгуьнлерде де белсенли яшавды юритип элимиздинъ оьрленуьвине оьз уьлисин аямайдылар.
Буьгуьнги меним хабарым да Кумлы авылынынъ яваплы эм коьримли йолын оьткен сыйлы ясуьйкени Саниет Иса кызы Насыровадынъ акында болады. Кумлы авылында ясуьйкенлеримиз Ялманбет эм Саниет Насыровлар ман 1973-нши йыл курылган татым аьелин конаксуьер, коьримли аьеллердинъ
бириси деп таныйдылар. Сол аьелде уьш увыллары Джалал, Мурат эм Расул оьсип, буьгуьнлерде оьз аьеллерин курып, аьвлетлерин аякка тургызып, туьз яшав йолына
онълап келедилер.
Аьел басы Ялманбет коьплеген уьйлер курып эм агаштан тоьр, уьйшиликте кулланылатаган баска муьлклерин ясап билген, коллары алтын болган агаш устасы, оьнерли курувшылардынъ бириси деп авылдасларына коьптен таныс. Ол совет йылларында коьп йыллар бойы совхоздынъ курылыс боьлигинде де етимисли куллык этип келген. Юмсак эм ашык шырайлы, сабыр кылыклы, акылбалык касиети мен баскаланган уьй бийкеси Саниет-абай оьз бактысын савда тармагы ман яслайын байлап, барганнанбарган сайын сайлаган кесписи ягыннан оьсип, сулыбын байытып келген. Ол Дагестан АССР-нынъ Караногай районынынъ Сылу-Тоьбе авылында 1952-нши йылдынъ казан айынынъ 7-нши куьнинде тувган. Кыз кишкей заманда онынъ аьели Шешен Республикасындагы Баклазан авылына коьшип, онда яшайды. Станица Червленнаядынъ ерли мектебинде билим алады. Ама уьшинши класстан алып сегизинши класска дейим кызга Кумлы авылында, оннан сонъ, йогары классларын Терекли-Мектеб авыл орта мектебинде окымага бакты буйырды. Савдалык тармагына ол оьзининъ яшавынынъ 36 йылдан артыгын багыслады, элине
оьз иси мен пайдалы болып келди.
Оьз аьрекетин Саниет Иса кызы алыс 1972-нши –1973-нши йылларында Ногай райПО-дынъ комиссионный, Ленин атындагы совхоздынъ промышленный
боьликлериннен баслайды. 1975-нши йылдан алып ога Кумлы авылдынъ «Промтовары» туькенин де етекшилемеге бакты буйырды. Онда ол ис йолдасы Кабират
Ваисова ман бирге аьрекетлеген. Ийги савда куллыкшысы болар уьшин, бириншилей, оьз кеспинъди янынъ ман суьймеге, алувшыдынъ керексинуьвлерин сыйлап
билмеге керек. Коьпйыллык яваплы иси оьз емисин берген заман да келди. Саниет Иса кызы патшалык планларын артыгы ман толтырганы эм авылдынъ яшавында
белсенли катнасканы уьшин, ислеген йыл тамамлары бойынша социалистлик базласувында йогары коьрсетимлери уьшин туьрли дережели дипломларга, Сый грамоталарга тийисли этилген. 1981-нши йылда сол сайлаган кеспидинъ иеси Саниет Иса кызы етимисли куллык этетаган кеспи куллыкшылары арасында оьткен Савлайсоюзлык социалистлик базласувларда енъуьвши де болып шыккан. Керекли товарлар ман алувшылардынъ, яшавшылардынъ керексинуьвлерин толысынша канагатлап келгени оьз емисин берип, эли мен белгиленмей калмады. Айтпага, кыскаяклы совет потребительлик кооперациядынъ отличниги болган, 1983-нши
–1985-нши йылларда Коммунистлик исининъ ударниги белгисине, 1986-ншы йылда «Знак почета» орденине де тийисли этилген.
Солай болып, 1979-ншы йылда Ногай районыннан РСФСР потребительлик кооперациядынъ 7-нши съездинде делегат болып ортакшылык эткен, авыл ямагаты яшавында белсенлиги уьшин Кумлы авыл советининъ депутаты болып та сайланган. Сол йылларда депутат эсабында ол оьз авылынынъ маьселелерин, соравларын шешуьвде белсенлик коьрсетип келген.
Ис ветераны кайзаманда да исин яваплы, сахый эм йогары оьлшемде этпеге шалысып келген. 2002– 2003-нши йылларда авыл администрациясында кассир
аьрекетин де уьстинликли юритип келген. Тыншаювга кеткеннен сонъ да, савдалык аьрекетин тасламай, байыр туькенин ашып, Кумлы авыл яшавшыларын азык-туьлик, уьйшиликте кулланув товары ман канагатлап келди.
Буьгуьнлерде ясуьйкенлеримиз, суьйикли исин койган болса да, сав куьшкуватын балдан таьтли он уьш уныкларын, эки немерелерин аякка тургызувга багыслайды, олардынъ аьр кайсысы да кыскаяклыдынъ эм онынъ ян косагынынъ яшавын маьнели эм толы этип, куьезге толтырмага шалысадылар. Буьгуьнлерде олар уьйкен уныгы, аьскерши, СВО катнасувшысы Джабраил мен де оьктемсуьвин ясырмайдылар. Эл коршалавшысы согыс оьзгерислери юрген ерде аьскер борышын яваплы толтырувда коьрсеткен йигитлиги уьшин Жуков атлы эм «За воинскую доблесть» 2-нши дережели медальлерине тийисли болувы тек онынъ аьелине тувыл, савлай авылына, халкына эм ясларга оьктемлик болады. Буьгуьн биз тийисли тыншаювда болган Саниет Иса кызын эм онынъ ян косагын тек янъыларда оьткен Халклар ара яс- уьйкенлер куьни мен ак юректен кутлаймыз. Ден савлыкты, ток коьнъилди, келеекте де наьсипли яшав йылларын, кардаш-ювыклары, аьвлетлери, уныклары ягыннан суьйимди эм уьйкен эс каратувды йораймыз. Оьткен йыллар коьнъилди тоьмен этпей, яшав кайратлыгынъыз коьпке дейим таьвесилмей келсин.
Г.Нурдинова.
Суьвретте: Саниет Насырова оьз ян косагы Ялманбет пен уныкларынынъ тоьгерегинде.
