23-нши февраль – Эстеликли байрам куьни. Сол байрам Тувган еримизди туьрли заманларда коршалаган, буьгуьнлерде коршалайтаган эм коршаламага аьзир эр йигитлерге сый-оьрмет этуьвдинъ белгиси болады.

Россияда ол – аьскершилик данъкынынъ, Аталык Коршалавшы куьни. Ол «Аьскершилик данък куьнлери (Россиядынъ енъуьв куьнлери)» деген федераллык законы ман 1995-нши йыл токтастырып, кабыл этилинип алынган. Бу эстеликли байрам куьни 1918-нши йылдан алып белгиленеди. Алдынгысы йылларда элимизде бу байрам куьни туьрлише аталган: 1922-нши йылда Кызыл Армия куьни, 1946-ншы йылда – Совет Армиясы куьни, 1949-ншы йылда – Совет Армиясы эм Согыс-Тенъиз Флот куьни. Сонъында, СССР бузылганнан сонъ, бу байрам Россияда Аталыкты Коршалавшыдынъ патшалык куьни деп аталып басланды эм 2022-нши йылдан алып официаллык аьлде тыншаюв куьни деп токтастырылган.