Ногай район администрациясында элимиздинъ Савытлы куьшлерининъ сырасына контракт бойынша гражданларды йиберуьв борышты толтырув акында сорав ман байланыста кенъейтилген ис кенъесуьви болып оьтти.
Ногай район аькимбасы Джамалутдин Эсиргепов бу сорав маьнели соравлардынъ бириси кепте аьр юма аппарат кенъесинде баьри де авыл басшыларынынъ, организациялар эм учреждениелер етекшилерининъ эслерине салынып турувын билдирди. Белгиленген сорав бойынша районда туьзилген аьлге артык
эс бермеге туьседи.
Онынъ соьзлерине коьре, буьгуьнлерде Ногай районыннан 300-ге ювык аьдем СВО-да катнасады. Болса да хыйлы аьдемлер Коршаланув министерствосы ман контрактка баска регионлардан кол басып кетедилер. «Айтпага керекпиз, бу зат – бизим исимиздеги кемшилигимиз. Сонынъ уьшин биз ерли-еринде
тийисли куллык юритпеге борышлымыз, бизим яшавшылар СВО-га Ногай район ериннен кетсинлер деп», – деди район етекшиси.
Кенъесте катнаскан Дагестан Республикасынынъ Авыл хозяйство эм азыктуьлик министрининъ 1-нши орынбасары, Шарип Шарипов оьз соьзинде Россия Президенти де, Дагестан Аькимбасы да йолыгыслар яде кенъеслер оьткерсе, дайым да биринши орынга буьгуьнлерде Аталыгымызды коршалавшыларды
салатаганына эс этти. Ол онынъ соьзлери мен, патшалыгымызды коршалав аьр биримиз уьшин де яваплы борыш болады.
– Буьгуьн мен авыл етекшилерин бизим алдымызга Дагестан Аькимбасы Сергей Меликов салган борышларды толтырув бойынша алдышылыкты алайык деп тилек саламан. Бу яваплы эм маьнели исти «кери сандыкка салмай», аьли ок белсенлигимизди коьрсетейик.
Савытлы куьшлер сырасына контракт бойынша куллык этуьвге кол басув яктан республикада квота толтырылады, тек коьп дагестанлылар СВО-га баска
ерлерден кетедилер, мине маьселе кайда.
Сонынъ уьшин биз оьз ердеслеримизге контракт бойынша бизим республикадан кетинъиз деп ис юритпеге борышлымыз. Сол борыш ондай кыйын тувыл, эгер биз баьримиз де соны толтырув уьстинде ислесек, – деп белгиледи Ш.Шарипов.
Кенъесте солай ок Дагестан Аькимбасынынъ ишки политика эм ерли самоуправление бойынша управление начальнигининъ орынбасары Марат Альбертович, республика парламентининъ депутаты Мурзадин Авезов та оьз ойларын айттылар.
Марат Альбертович Россия Савытлы куьшлерининъ сырасында янъыларда шыккан беспилотниклер аьскер кеби акында хабарлады. «Бу аьскер кеби СВО
еринде энъ де кавыфсыз деп саналады, сога бармага суьетаганлар контракт туьзбеге боладылар. Сол аьдемлер сонъында бизди баска аьскер кеплерине йибермеге боладылар деп навасызланмага керек тувыл, олар сонда куллык этееклер», – деп анълатты ол.
Мурзадин Авезов ДР Халк Йыйыны дуныядагы, элдеги, республикадагы аьллерге, РФ Савытлы куьшлери сырасына контракт бойынша куллык этуьвге
уьйкен эс беретаганын белгиледи.
Соравды ойласувда солай ок Ногай район хатын-кызлар советининъ председатели, ДР Ямагат палатасынынъ агзасы Асият Манкаева, район Ямагат
палатасынынъ председатели Эльмурза Саитов та катнастылар. Асият Манкаева район ерине военкоматты кайтарув акында соравды коьтерди, неге десе аьлиги авыр заманларда бу тармакты оптимизациялав келиссиз ис. Район яшавшыларына, СВО катнасувшыларынынъ аьеллерине 100 шакырым эректе Тарумов район орталыгында орынласкан военкоматка барув-келуьв де енъил тувыл. Шарип Шарипов оьз ягыннан бу соравды республикадынъ йогары етекшилерине еткермеге соьз берди.
М-А.Ханов.