Элди коршалав – киели борыш
Янъыларда Кизляр, ЮжноСухокумск калалары эм Кизляр районы бойынша военкоматынынъ азбарында куьзги шакырув бойынша ясларды срочный аьскер службасын оьтпеге йолга салув ман байланыслы шара шатлыклы аьлде озгарылды. Ясларды аьскер сырасында – йолга салмага эм оларга насихат соьзлерин айтпага келгенлердинъ сырасын Кизляр район администрациясынынъ аькимбасынынъ биринши орынбасары Тимур Гаирбеков, Кизляр, Южно-Сухокумск калалары эм Кизляр районы бойынша военкоматынынъ военный комиссары Рамазан Курамагомедов, СВО ветераны, «Память гор» Дагестаннынъ регионаллык ямагат организациясынынъ Кизляр кала бойынша боьлигининъ кураторы Рамазан Ахмедов, «Союз ветеранов ополчения 1999 года» деген регионаллык ямагат организациядынъ вице-президенти Ахмедпаша Амирилаев эм олардынъ кардаш-тувганлары эм тенъдослары. Шара барысында Рамазан Курамагомедов Дагестан Республикасынынъ военный комиссары Абдурахман Мурадханов атыннан тынышлыкты эм онынъ берклигин саклавда, оьсип келеятырган несилди патриотлык сезиминде тербиялавда, баска болып, ямагат яшавында белсенли катнасканы уьшин, гражданлык бирлесуьвлигин берк этуьвде эм ясларда анъ-эдап баалыкларын кеплендируьвде этип келген маьнели косымы уьшин Терский казак аьскер ямагатынынъ Кизляр каласындагы айырым япсарлык окружной казак ямагатынынъ (КОПОКО) атаманы Василий Наумочкинге эм Тарумов район Депутатлар Йыйынынынъ председатели Хабибула Халимовка Разылык хатын тапшырды. Тимур Гаирбеков Кизляр районынынъ аькимбасы Аким Микировтынъ атыннан ясларга каратылган соьзинде, олар янъы аьскершилик кесписин байырлап кайтканын, барган ерде тувган районын тийисли коьрсеткенлерин йорады. Шарадынъ шатлыклы кесеги тамамланган сонъ, аьскерге кетеек яслар йыйылыс пунктына йол алдылар, оннан олар аьскершилик службасын оьтпеге туьрли аьскер сыраларына йиберилееклер. Белгилеп озайык, ясларды аьскер сырасына куьзги шакырув кампаниясы карагас айынынъ 31-нши куьнине дейим озгарылаяк, эм срочный службадынъ болжалы бир йыл болады. Суьвретте: ясларды аьскерге йолга салув мезгили.