23 февраль – Аталыгын эм аьелин, тувган ерининъ эм Элининъ онъайлыгын, рахатлыгын баалаган эм аявлаган аьр биревди бирлестирген байрам. Бу куьн аьскерши-интернационалистлерге, согыс оьзгерислер катнасувшыларына, аьскер боьликлерде эм ыхтыярсаклав органларда тыныш болмаган исти бардырганларга сый этпеге тийисли. Буьгуьнлерде энъ де уьйкен разылык согыс спецоперация катнасувшыларына каратылады, олар —Уллы Енъуьвдинъ асабалары эрлик, шыдамлык, аьскер борышларын толтырувда ис усталык, Аталыгымызга алаллыгын эм енъуьвге ымтылысын коьрсетедилер, баьтир атайларымыздай болып нацизм мен куьреседилер, савдуныядагы тынышлыкты коршалайдылар.
Бу байрам куьнинде эр кисилерге коьтергишлевди эм йылувлыкты сездируьв бек маьнели. Боьтен де оьз уьйиннен узакта аьскер исин бардырганларга эм СВО катнасувшыларына. Сонынъ уьшин Аталыкты коршалавшы куьнининъ алдында ТереклиМектеб авылында ерлестирилген аьскер боьлигининъ куллыкшыларын кутлав ийги аьдетке айланган. Бу йыл да аьдет бойынша район Хатынкызлар совети, Ногай район администрация, Терекли-Мектеб авыл администрация ваькиллери, соны ман бирге А-Х. Джанибеков атындагы мектеби де аьскер боьлигине азыклар, таьтли зияпетлер, емислер, соклар аькелип, каьр шегуьвин коьрсеттилер.
Аькелинген савкатлар сырасында бу кыстынъ куьнинде аьскершилердинъ юреклерин энъ де куьшли А-Х. Джанибеков атындагы мектебининъ балалары язган хатлар йылыттылар. Халк яратувшылык орталыгы озгарган концерт олардынъ коьнъиллерин коьтерди.
Шарады аьскер боьлигининъ командирининъ орынбасары, тамада лейтенант Владислав Архипов ашты.
Ол Аталыкты коршалавшы куьнининъ алдында эм баска байрамларда аьскершилерге эс этилетаганы уьшин разылыгын билдирди эм аьскер боьлигининъ етекшилевининъ кутлавын окыды.
Шара барысында аьскершилерге йылы йоравларын Ногай район администрация аькимбасынынъ орынбасары Мурат Шадиев, ДР Ямагат палатасынынъ агзасы, район Хатын-кызлар советининъ председатели Асият Манкаева, район администрация ислерининъ етекшиси Алия Кусегенова, Терекли-Мектеб авыл аькимбасынынъ орынбасары Земфира Эрембетова, СВО катнасувшысынынъ анасы, А-Х. Джанибеков атынынъ етекшиси Курасхан Ярикбаева, «Яслык» яслар орталыгынынъ етекшиси Абибулла Шамбилов караттылар.
Сонъ окувшылар Амалия Дандиева и Саида Даурбекова Тувган Эл акында ятлавлар яттан айттылар. Йырлавшыларымыз Зульфия Аджигеримова эм Каирбек Кокенеев патриотлык йырлар йырладылар. «Карлыгаш» балалар хореографиялык ансамблининъ катнасувшылары ярасык биювлер коьрсеттилер. Шарады Гюльгерен Савкатова
юритти. Байрам куьнининъ йылувлыгы, куьн коьзининъ ярык саьвлелери юреклерде ийгиликке, тынышлыкка, тезден Енъуьв келеегине сенимди кондырды.
Нурият Кожаева.
