Савдуныялык баладынъ ден савлыгын саклав куьни йыл сайын октябрь айынынъ биринши дуьйсемби куьнинде белгиленеди. Бу йыл сол куьн 6-ншы октябрьге келеди.
Ата-аналарга баладынъ ден савлыгын саклавда керекли маслагатларын Ногай район орталык больницасынынъ врач-педиатры Амина Махмудова береди. – Баладынъ савлыгын саклавда баьри зат та маьнели: тийисли заман уйклав, дурыс эм пайдалы тамакланув, сонынъ сырасында витаминлер кулланув, физкультура ман каьр
шегуьв, иммунитетти коьтергишлев.
Балалардынъ ашаган азыклары витаминлерге, минералларга бай эм соларда тийисли оьлшем белоклар, майлар эм углеводлар болмага керек. Олардынъ тамакланувында емислер, ясылшалар, эт, суьтли азыклар, сары май, юмырткаболсынлар. Саьбийлердинъ иммуный тармагы «саьат» кимик ислер уьшин, ол спорт секцияларга юрсе эм уьйшиликте авыр болмаган куллыклар этсе, яхшы. Ата-аналарга баладынъ уйкысына да маьне берув керек. Уйкыга тоймаган балалар авырымага амырак боладылар. 2-10 ясындагы балалар 10-11 саьат, 11-14 ясындагылар – 9-10 саьат, 15-17 ясындагылар 8-9 саьат уйкламага тийислилер.
Саьбийлерде берк иммунитет туьзилуьвде баладынъ шегининъ сав микрофлорасы маьнели орынды тутады. Баланъызга тез-тез пайдалы бактерияларга (пробиотиклерге) бай суьтли ишимликлер беринъиз, айтпага, кефир эм йогуртлар.
Шарктынъ куьшли коршалав амалы –вакцинацияга эс бермей коймага ярамайды. Куьз басланганда, савлай элимизде грипптен вакцинация этилинеди.
Аявлы ата-аналар, вакцинация – балаларга керекли. Оьзек те, прививка алган бала авырымайды деп айтып болмаймыз, ама ол авырувдынъ авыр кебиннен саклайды.
Аьзирлеген Нурият Кожаева.