Янъыларда А.Асанов атындагы Нариман авыл мектебининъ негизинде окувшылар сырасында «Ак ладья» шахматлар бойынша Савлайроссиялык турнирининъ муниципаллык кезеги оьтти. Турнир Ногай район Билимлендируьв боьлиги мен уйгынланды, а шарады озгарув билимлендируьв боьлик методисти Байрамали Бекмурзаевке, К.Оразбаев атындагы Бораншы авыл мектебининъ окытувшысы Тимур Елакаевке эм шахматлар бойынша тренер Арслан Елакаевке тапшырылган эди. Базласларда муниципалитеттинъ 7 мектебиннен 30 окувшылар катнастылар, Байрамали Бекмурзаев, шарадынъ
ашылувында баьри йыйылганларды хошлап, яс спортсменлерге уьстинликлер эм оьз куьшине сенуьвди йорады.
Мине кызувлы ойынлар басландылар. Аьр бирев енъуьвге ымтылысында баьри куьшин салды. Алты турдынъ сырагысы бойынша 1-нши орынды – А-Х.Джанибеков атындагы мектеби, 2-нши орынды – Кадрия атындагы мектеби, 3-нши орынды К.Кидирниязов атындагы Карагас авыл мектеби бийледилер.
Базласлар уьш туьрли такталарда оьттилер. Биринши тактада 1-нши орынды– Нурлан Байгараев (Кадрия атындагы мектеб), 2-нши орынды – Айдемир Картакаев (Карагас авыл мектеби), 3-нши орынды – Ахмад Картакаев (А-Х.Джанибеков атындагы мектеби) казандылар. Экинши тактада 1-нши орынга – Султан Солтанов (Кадрия атындагы мектеби), 2-нши орынга – Мансур Юмартов (А-Х. Джанибеков атындагы мектеби), 3-нши орынга – Абубакр Адисов (Карагас авыл мектеби) тийисли болдылар. Уьшинши тактада енъуьвши А-Х.Джанибеков атындагы мектеб окувшысы Альберт Елакаев болды, 2-нши орынга – «Ногай Эл» балалар бавынынъ тербияланувшысы Давид Елакаев, 3-нши орынга – Кадрия атындагы мектебининъ окувшысы Мухаммад Динашов тийисли
болдылар.
Кызлар сырасында Амира Исмаилова (А-Х.Джанибеков атындагы мектеби) енъуьвши болды, 2-нши орынга – Айяне Адиева (Нариман авыл мектеби), 3-нши
орынга Амелие Сатырова (Карагас авыл мектеби) тийисли болдылар. Енъуьвшилерге савгаларды Ногай район Билимлендируьв боьлик етекшиси Амерхан Зейнадинович Межитов тапшырды. Коькек айында А-Х.Джанибеков атындагы мектеби «Ак ладья» турнирдинъ республикалык кезегинде Ногай районды ваькиллеек. Оларга уьстинликлер эм енъуьвлер йораймыз!
Нурият Кожаева.
Суьвретте: ойынлардан сонъ.