Ногай районынынъ администрациясында шатлыклы аьлде муниципалитеттинъ басшысы Джамалутдин Эсиргепов эм Депутатлар Йыйынынынъ председатели Алибек Менласанов быйыл Кыргызстан Республикасында оьткен Савлайдуныялык коьшпели халкларынынъ ойынларынынъ катнасувшылары ман йолыгыстылар. Авдарыс спорт кебинде ердеслеримиз халклар ара ярысларда халкымызды ийги этип коьрсеттилер. Енъуьвшилердинъ сырасында – авдарыс бойынша бас тренери, ногайлардынъ аьдеттеги атлар ярысын янландырувга уьйкен уьлис коскан Кемалуддин Нурлубаев, авдарыс бойынша Россия йыйылма командасынынъ агзалары эм Савдуныялык коьшпели халкларынынъ ойынынынъ призерлары Альмир Апазов, Исмаил Амангельдиев эм Тангатар Курманакаев.
Йогары усталыгы, аьзирлев дережеси эм Ногай районын ийги этип коьрсеткени уьшин район аькимбасы Д.Эсиргепов спортсменлерге савкат сертификатлар тапшырды. Алибек Менласанов енъуьвшилерди Сый грамоталар ман савгалады. Шарада Карасу авылынынъ депутаты Мурат Аджимуллаев катнасты, бу авылдан да спортсменлер бар эди.
Йолыгыста бу спорт кебининъ оьрленуьвининъ йолларын, аьдетлерди саклавды ойластылар. Эки йылдан ойынлар Казань каласында оьтеек эм бу майдан спорттынъ миллет кеплерин келеекте оьрлендирмеге маьнели ер болаягын белгиледилер.
З.Ваисова.
Суьвретте: йолыгыстан коьринис.