Ногай драма патшалык театрынынъ репертуарында быйыл коьрнекли спектакльлер бар экенине баьримиз де шайыт болдык. Янъыларда театрдынъ актерлары балалар
уьшин салынган «Кощеевы страсти» деп аталган Н.Панфиловтынъ пьесасы бойынша спектакль коьрсеттилер. Спектакльдинъ режиссер-постановщиги
театр актеры Мурат Аджимуллаев.
Балалар эртегидинъ сыхырлы есирине туьсип, бас баьтирлери мен бирге заманды завклы оьткердилер. Кощей, Баба-Яга, Фея. Олардынъ кайбириси саьбийлерди ийгиликке, аьдилликке, акыйкатлыкка уьйретедилер.
Спектакльди ТереклиМектеб, Шумлелик авылларында коьрсеттилер. Актерлар, Ногай районынынъ мектеблерине барып, эртегиди балаларга коьрсетпеге ниетленедилер.
Балаларга сондай спектакльлер коьрсетилсе, олар «яман» ман «яхшыды» айырып уьйренерлер. Спектакльде Ногай драмалык театрынынъ актерлары Бурлият Нургишиева, Саида Кельдасова, Тимур Аджиев, Райганат Суюндикова, Арслан Межитов, Каирбек Кокенеев ойнадылар. Келеекте сондай проектлер болаягына шекленмеймиз.
Г.Бекмуратова.
Суьвретте: спектакльден коьринис.