Уьстимиздеги йылдынъ канътар айынынъ 20-ншы куьнинде, Ногай районымыздынъ халк яратувшылык орталыгында, Ногай районы бойынша Россия МВД боьлигининъ участковый уполномоченныйлары 2025-нши йылда этилген куллыклар бойынша эсап бердилер. Бу куьн мунда авыл яшавшылары, ыхтыярсаклав органларынынъ, авыл еринде аьрекет бардыратаган организацияларынынъ куллыкшылары бар эдилер.
Президиумдагы орында Россия МВД боьлигининъ республикадан кураторы Гаджи Габибула увылы Гасанкадиев, Ногай районы бойынша Россия ОМВД етекшиси Ислам Абакар увылы Турлавов, кесек заманга полиция етекшисининъ исин толтырувшы Замир Рашид увылы Заргишиев, Терекли-Мектеб авыл аькимбасы Марат Избулла увылы Кулунчаков ерлескен эдилер.
Йыйынды полициядынъ участковый уполномоченный боьлигининъ эм ясы етпегенлер ислери бойынша инспекторлардынъ етекшиси Крымхан Кусепов ашты. Бу куьн мунда конак болып келген власть органларынынъ ваькиллери мен таныстырганнан сонъ, ол Ногай районымыздынъ ТереклиМектеб авыл еринде аьрекетин бардыратаган участковый уполномоченныйларга соьз берди.
Шарада эсап беруьв докладлары ман авыл участковыйлары Салим Бекбулатов пан Айнадулла Абубекеров шыгып соьйледилер. Аьр кайсысы да йыйылганларга оьзлери кавыфсызлыкты канагатлайтаган авыл орамларында болатаган кыянатлыклар, солардынъ ашыкланувы акында, кайдай маьселелер мен олар куьн йорыгында расатаганларын да айтып кеттилер.
Участковый уполномоченныйынынъ ис аьрекети тынышлардан тувыл, олар оьзлери аьр кайсы кыянатлык бойынша да, баслап, оьзлери карар алмага тийисли боладылар. Олар – яшавшылар ман бирге эм солар арасында. Салим Бекбулатов оьзининъ борышы бойынша тапшырылган авыл кесегиндеги оперативлик аьлди, кыянатлыклардынъ статистикалык билдируьвлерин эткеннен сонъ, берилген соравларга явап берди, маслагатлар да тынълады.
Аьр кайсы участковый уполномоченныйды йыйылганлар уьйкен кызыксынув ман тынъладылар. Бу куьн мунда конак болган Гаджи Габибула увылы Гасанкадиев участковый яслардынъ соьйлевине уьйкен баа берди эм келеекте олар, сулыплары беркиген сайын, ийги куллыкшылар болаягын айтты эм
оьз йоравларын да этти.
Йыйында ортакшылык эткен ыхтыярсаклав органларынынъ ветеранлары Заур Мемеков, Зейдулла Аджибайрамов, ямагат ис аьрекетин бардырувшы Залимхан Кочеров участковый уполномоченныйларына ийги йоравларын эттилер эм, биз бир район яшавшылары болганнан сонъ, бирбиримизди де аьруьв таныймыз, сога коьре, аьдемшилик касиетимиз йогары алмага керек болады, бир-биримизди айыплап, баьле излеп турганнан, биргелес куллыкларды юритуьв керек, деген ойларын да билдирдилер.
– Коьп йыллар ыхтыярсаклав тармагында ислеген аьдемлерде сулып та, ой-акыл да аз болып болмайды, аьдемлер касиетлерин де аьруьв таныймыз, кайдай аьллерде, ызы кайтип битееги де бизге белгили, солай болганда, бизим сизге береек маслагатларымыз, эш те, буршав бермес, – дедилер сыйлы ис ветеранлар.
Йыйында йол юрис йорыклар бузылув, наркотикли алатлар ман пайдаланув акында маьнели соьз коьтерилди. Анълатып озайым, йол юрис йорыклар бузылувлар акында, аьли кыс шагы, кар да аяз да болады, балалар, оьспирлер автокоьлик артына ябысып, шана тиркеп, кыдырадылар, сол кавыфсыз зат тувыл. Республика бойынша сол ойын казага аькелген ерлер де аз тувыл. Ойсыз ойын, аьдем яшавын да кыскарткан.
Ыхтыярсаклав органынынъ ис ветераны Зейдулла Аджибайрамов яслар арасында, баскалай болсын, наркотикли алатлар кенъ яйылатаганы акында хабарлар йыйы эситилетаганын да билдирди. Ога тувра явапты полиция етекшисининъ исин юритуьвши Замир Заргишиев берди:
– Ясыртын зат тувыл, районымызда наркотикли алатларды кенъ яйылдырув, туьрли ерлерден тасув ман байланыслы кыянатлыклар бар, саны да белгили. Ис юритиледи. Мектеблерде балалар ман да, солар ман пайдаланув ийги затка аькелмейтаганы, карсы турув ман байланыслы профилактикалык ислер юритиледилер. Оьткен йыл ишинде мектеблерде уьш юзден артык лекциялар окувшыларга окылдылар, туьрли шаралар юритилдилер, – деди ол.
Участковый уполномоченныйларынынъ эсап беруьв йыйыны – аьдемлер яшайтаган административлик участокларында этилген куллыклар эсабы келтирилетаган шара.
Россия МВД боьлигининъ нормативли акты бойынша йылда бир кере сондай эсап беруьв йыйыны оьткериледи.
Бу куьнги йыйын бойынша да айырым ой-токтаслар этилдилер – полиция куллыкшылары, боьтен де участковый уполномоченный ямагат пан, ерли власть органы ман бирге ис аьрекетти бардырмага керек.
Йолыгыстынъ бас мырады да сол – Ногай районымызда ыхтыярйорыкты эм кавыфсызлыкты саклавга каратылган биргелес исти белсентуьв.
Г.Курганова.
Суьвретте: йыйын барысында.