Уьстимиздеги йылдынъ навруз айынынъ 18-нши куьниннен алып Уллы Аталык согысынынъ эм согыс спецоперация баьтирлерининъ йигитлигин оьмирлетуьв мырат пан «Эстелик бавы» Савлайроссиялык эм халклар ара акциясы аьрекетлеп баслады. Сол Енъуьв куьнин байрамшылавга багысланган ой-баславы, аьр бир эгилген теректи Элимизди коршалавда турганлар акында, эстелик эм разылык белгисине айландырады. «Эстелик бавы» тек тереклер болып калмай, ол уьйкен тири эстелик те болады.
Савлай Элимизде эм онынъ тысында да оларга уьйкен маьне берилип, йигитлеримиз акында эстелик беркип барганлай, соьйтип терек те куьш алып оьседи. Олар бизге
таза ава, салкынлык эм ярасыклык савкатлап, йигитлеримиздинъ ийги ислери акында эсимизге туьсирип келеегине соьз йок.
Сол амал бизге тынышлы коьгимизди савкатлаганлар уьшин разылыгымызды билдируьв болады. Ногай районы сол онъайлы акцияга белсенли кирисуьви мен, яс несилди тербиялавга эм тарих эстеликти саклавга алаллыгын коьрсетеди.
Ногай орманлык хозяйствосынынъ ис коллективи Ногай район Хатын-кызлар советининъ председатели Асият Бадиевна Манкаева ман бирге районнынъ уьш билимлендируьв ошакларында маьнели шараларын озгардылар. Сол куьнлерде акция бойынша, айтпага, аьлбели, алма, коьгем, нектарин тереклери олтыртылдылар. Дагестаннынъ Бавшылар союзынынъ председатели Сайдулла Амирханович Орусханов пан тегин 100 тереклер шашув ниет пен берилгени, коьтергишлеви уьйкен разылык
соьзлерине тийисли этилди. Ногай районынынъ А.Б.Асанов атындагы Нариман авыл орта мектебинде «Эстелик бавы» акциясы айырым маьнеси мен озгарылды.
Шарада Нариман авыл яшавшысы, СВО катнасувшысы Рустам Оразбаевич Магомедов ортакшылады. Госпитальден кыска болжал тыншаювга уьйине келген ердесимизге биринши теректи шашпага ыхтыяр берилди. Мектебте сол куьн от туьсуьв кавыфсызлыгы бойынша дерислери озгарылдылар, эм Асият Манкаева окувшыларга согыс ветеранлары акында эм келеятырган 9-ншы Май байрамы акында хабарлап эситтирди.
Сол куьнлерде Ногай районынынъ Ш.Ю.Менлигазиев атындыгы Батыр-Мурза авыл орта мектеби де Савлайроссиялык «Эстелик бавы» акциясын озгарув майданы болды.
Шарада Ногай орманлык хозяйствосынынъ етекшиси Феруза Дикинова эм Ногай район Хатынкызлар советининъ председатели Асият Манкаева шыгып соьйледилер. СВО катнасувшысынынъ анасы, шарадынъ сыйлы конакларынынъ бириси М.Муталимовага биринши теректи шашпага ыхтыяр берилди. Шарадынъ барысында Ногай орманлыктынъ етекшисининъ орынбасары Д.Амамбаева да окувшылар ман от туьсуьвдинъ кавыфлы шагы акында кенъес озгарды. Окувшылар шашылган тереклерди уьйкен коьнъил мен сувгардылар, тынышлы коькти савкат эткен йигитлер акында эслеринде тутпага, олардынъ артыннан келеекте карамага соьз бердилер.
Сол акцияга Ногай районынынъ Бораншы авыл К.Б.Оразбаев атындагы орта мектеби де косылды. Шатлыклы линейкада СВО еринде яны курман болган согыс спецоперация катнасувшысы Алибек Шамсудиновтынъ анасы, Ногай район Хатын-кызлар советининъ председатели эм Ногай орманлыгынынъ етекшиси шыгып соьз айттылар. Биринши теректи олтыртпага ыхтыяр СВО-да ян берген Алибектинъ ата-анасы Динибек эм Авархан Шамсудиновларга берилди. Тереклер шашкан сонъ, окувшыларга «Орманлыкты от туьсуьвден сакланъыз» деген темага дерис озгарылды.
Аьр бир шашылган терек, тек ясыл оьсимлик болып калмай, элимизди коршалаганлардынъ курманлыгы эм юмартлыгы, йигитлиги акында тирилердинъ эсине туьсирип келер. Бу эстелик бавы, несилден-несилге Элимизге суьйимди эм йигитликтинъ тарихин коьширип, дайым оьсип эм беркип бараягына соьз йок.
Г.Нурдинова.
Суьвретте: шарадан коьринис.