Тувган Элимиз уьшин куьресте оьзининъ яс янын аямаган йигитлер оьмирлерге халк эсинде эм юрегинде сакланадылар.
Тап соьйтип аьлиги заманда россия аьскерлери юритип турган согыс спецоперациясында катнасып, элин явдан коршалавда янын берген Ногай районынынъ Бораншы авылынынъ яшавшысы Алибек Шамшудиновтынъ (Алла ога тынышлык берсин) эм баска ясларымыздынъ баьтирлигине сый этип, авылдынъ орта мектебининъ азбарында быйыл апрель айында «Эстелик бавы» ашылган эди. Сога багысланган шарада ДР Ямагат палатасынынъ агзасы, Ногай районынынъ хатын-кызлар советининъ председатели, Асият Манкаева ман ГКУ «Ногайское лесничество» директоры Феруза Дикинова да ортакшылык эттилер. Феруза Курманали кызы сол куьн оьзи мен емис тереклер де аькелип, соларды балалар ман бирге «Эстелик бавында» олтыртты.
Сол бав эгилетаган куьн Алибек Шамшудиновтынъ атасы Динибек пен анасы Авархан бав еринде артезиан казбага деп соьз берген эдилер. Айтылган соьзине бек болып олар янъыларда мунда артезиан каздырдылар. Соны ман аьлиги заманда бав ишинде сув эркин агады, тереклер де яз куьнининъ шувагына коьмилип оьседилер.
Мен йогарыда аталган аьдемлерге, айырым кепте Динибек пен Авархан Шамшудиновларга оьзимнинъ эм мектеб коллективи атыннан уьйкен разылыгымды билдиремен. Оларга берк ден савлыкты, тынышлыкты, аьеллерине эмишликти, узак оьмирди эм уьстинликлерди йорайман!
Б.Зарболганов,
Бораншы авыл орта мектебининъ директоры.