Республикамыздынъ бас каласы Махачкалада 28-нши номерли гимназия еринде Россия Баьтири Абдулхаким Исмаиловка шатлыклы аьлде бюст ашылувына багысланган шара болып озды. Онда Дагестан Республикасынынъ Аькимбасы Сергей Меликов, депутатлар, ямагат аьрекетшилери, окытувшылар эм окувшылар ортакшылык эттилер.
Абдулхаким Исакович Исмаилов – Уллы Аталык согысынынъ аты белгили данъклы ветераны, тамада сержант, разведчик. Ол – данъклы фронт корреспонденти Евгений Халдейдинъ суьвретиндеги 1945-нши йылдынъ 2-нши май куьнинде енъилген Рейхстаг уьстинде Кызыл Байракты – Уллы Енъуьвдинъ белгисин ерлестиреяткан уьш аьскершилерининъ дуныя тарихине киргенлердинъ бириси.
Дагестаннынъ Хасавюрт районынынъ Чагаротар авыл яшавшысы Абдулхаким Исмаилов данъклы аьскерлик йолы ман Сталинградтан Берлинге дейим еткен, яраланган, йигитлиги уьшин орденлер эм медальлер мен савгаланган. Россия Федерация Баьтири данъклы атына ол немец-фашист баскыншылары ман куьресуьвде коьрсеткен йигитлиги уьшин 1996-ншы йылда тийисли этилинген.
Дуныядан тайды Абдулхаким Исмаилов 2010-ншы йылдынъ 16-ншы февралинде. Онынъ атын орамлар, мектеблер эм солай ок киши планета да юргистеди