Янъы яшавдынъ дуныяга тувувында медициналык куллыкшысы, бас деп, акушер бек уьйкен орынды тутады. Акушерлик иси аркалы дуныяда наьсипли аьеллердинъ саны оьсип, аьр бир янъы тувган саьбий – онынъ кеспилик етимиси, енъуьви болады. Ногай районынынъ Куьнбатар авылынынъ яшавшысы Караева Шахрузат Янибековна медициналык тармагында 40 йыллар бойы етимисли аьрекет этип келеди. Ол 1964-нши йылдынъ карагыс айынынъ 16-ншы куьнинде Янибек эм Насипхан Даутовлардынъ бес балалы куллыксуьер аьелинде тувып оьскен. Астрахань медициналык училищесинде билим алган сонъ, кыз оьз аьрекетин Ногай район поликлиника боьлигинде, оннан сонъ Шуьмлелик авыл ФАП-да – медсестра, Куьнбатар совхозынында фельдшер, совхоз тайганнан сонъ, Куьнбатар авылынынъ врачка дейим амбулаториясында акушер болып, буьгуьнлерде сол ок медициналык ошагын етимисли етекшилеп те келеди. Ислев йыллары ишинде ол район бойынша кыскаяклылар консультация врачы
Аскер Арсланов, Куьнбатар амбулаторияда оьзи мен аьрекетлеп келген Арувзат Шабагатова, Альмира Межитова, Райхан Шангереева, Хаирниса Нурлубаевадан кеспи сыхырларына уьйренип, сулыбын оьстирип, байытып келди. Буьгуьнлерде онынъ яс ис коллективин медициналык куллыкшылары Аминат Шокаева, Румия Койлакаева, Зульфира Оразлиева, Тойлыхан Суюндикова, Салимет Эстувганова эм коьлик айдавшы Иса Караев туьзип, аьр кайсысы да оьз исин йогары кеспили, яваплы толтырмага шалысадылар. Шахрузат Янибековнадынъ етекшилеви астында ис коллективи 2021-нши йылда ийги ярастырылган эм аьлиги заманнынъ алатлары ман канагатланган врачебный амбулаториясында, Куьнбатар, Бажиган эм 16 кошарларындагы 1180 яшавшыларынынъ савлыгын саклавды канагатлап, етимисли каьрлейдилер. Етекшидинъ белгилевине коьре, бу йылдынъ эсабына коьре, онда саьбийлердинъ тувувы ТереклиМектебтен сонъ экинши орында, йыл бойынша 15-16 бала тувады, 10 бала табаяк кыскаяклылар да эсапта турадылар. Буьгуьнлерде йогары дережели акушер 40 йыллар етимисли ис аьрекети уьшин ДР Савлыкты саклав министерствосы, авыл администрациясы, медицина профсоюзы атыннан Сый грамоталарына тийисли этилген.
Исин юреги мен суьйген Шахрузат Янибековна наьсипли ана да болды. Ол оьз ян косагы, коьп йыллар окытувшы болган Иса Мусаевич пен эки аьвлетлерин Гульфира эм Камильди оьстирип, оларга йогары билим берип, тувра яшав йолына онълаганлар. Гульфира – Ставропольде МВД куллыкшысы, Камиль – етимисли предприниматель.
Буьгуьнлерде Караевлердинъ куьезин доьрт уныклары эм йиенлери арттырадылар. Шахрузат Янибековнады эм онынъ ис йолдасларын кеспили байрамы ман кутлап, оларга берк ден савлык, куллыгында бийик етимислер йораймыз.
Г.Нурдинова.
Суьвретте: Шахрузат Караева.
