Оьмирлер бойы бизим элимизде татымлыктынъ, сенимликтинъ, авылдаслыктынъ аьдет-йорыкларын саклаганлар эм арттырганлар, халклардынъ миллет маданиятын оьрлендирмеге шалысканлар. Халклар бирлигининъ куьни россия ямагатлыгынынъ бирлесуьвин эм несиллер байланысын белгилейди. Сол байрамга рас барып, элимиздинъ туьрли калаларында эм авылларында Россия халкларынынъ фестивальлери озгарыладылар. Сонда уллы элимиздинъ туьрли халклары миллет аьдетлерин, маданиятын, асханасын коьрсетедилер.
Янъыларда Курск каласында озган Россия халкларынынъ фестивалинде Ногай районыннан Отегеновлардынъ аьели катнасты. Фестивальде Курск
каласында аьрекетлеген балалар бавлары ортакшылык эттилер. Балалар бавларынынъ тербияланувшыларынынъ аьеллери туьрли миллетлерди ваькилледилер. Белгиленген калада Садиин эм Кайтархан Отегеновлардынъ увылы СВО катнасувшысы, «За заслуги перед Отечеством» орденининъ медали
мен савгаланган Джамалдин Отегенов службасын бардырады, мунда онынъ аьели де яшайды, доьрт ясындагы увылы Ислам балалар бавында мектебке
аьзирленеди. Соьйтип Кайтархан Отегенова синълиси Насипхан Баякаева эм келини Елена Отегенова ман бирге уныгы Ислам тербияланган балалар бавы атыннан ногай халкын ваькилледилер.
Олар ногай миллет кийимин кийип, сыпырага миллет зияпетлер: бавырсаклар, йыпатаклар, катлама, ногай шай тиздилер. Фестиваль катнасувшыларын
ногай миллет зияпетлерининъ даьмин тарттырмага амаллы эттилер. Насипхан Отегенова ногай халкынынъ, онынъ тарихи, аьдетлери акында кызыклы
хабарлады. Кишкей Ислам ортага шыгып, йыйылганлардынъ коьнъилин коьтерип, лезгинка биювин бийиди. Отегеновлардынъ аьелининъ ортага
шыгып, халкынынъ аьдетлерин, маданиятын коьрсетуьви баска балалар бавларынынъ сырасында энъ де ийги деп белгиленди. Балалар бавынынъ педагогикалык коллективи оларга Разылык тапшырды.
– Фестиваль бек йылы, татымлык аьлде озды.
Шара катнасувшылары орыс, казах, курд, азербайджан эм баска халкларды ваькилледилер. Азербайджан халкынынъ маданияты ман таныстырган кызалак Дагестан акында оьз тилинде ятлав окыды. Курд аьели болса оларда тойлар кайтип озатаганы акында хабарладылар, орысларды ваькиллеген тербиялавшы халкынынъ биювлерин коьрсетип, аьдетлери акында айтты, балаларга Россия байракларын пайлады, –деп хабарлады фестиваль барысы акында Кайтархан Юсуповна.
Аьр бир халктынъ оьз киши тувган ери бар. А бизим ортак Аталык – ол Россия. Сосындай шаралар балалар бавларында озгарылувынынъ пайдасы
бек уьйкен, саьбийлер кишкейлей баска халклардынъ аьдетлерине, маданиятына сый этип уьйренедилер, сол бизим коьпмиллетли элимиздинъ халклар ара татымлыгын беркитуьвге демевлик этеди.
Нурият Кожаева.
Суьвретте: шарадан коьринис.
