Янъыларда конъысы Ставрополь крайындагы Полтавское авылынынъ маданият уьйинде «Бирге болган шаклы, бизди бирев де енъмес» деген шакырув астында «Разноцветный хоровод» деп миллет маданиятлар фестивали оьтти. Белгиленген шарада Ногай районынынъ Орта-Тоьбе авылынынъ маданият
уьйининъ етекшиси Зульфия Тойманбетовна Оразова, авыл китапхана заведующийи Сеперхан Казуевна Джумагишиева, 8-нши класс окувшылары Келдимурат
Боршакаев эм Эльфида Кошанова катнастылар.
Фестиваль Полтавское авылыннан узак болмаган ерлерде яшаган туьрли миллетлерди, айтпага, орысларды, ногайларды, эрмелилерди, такжиклерди биргелестирди. Мунда аьр бир аьдем баска халктынъ миллет подворьесине барып, аьдетлери мен, маданияты, санияты ман таныспага, миллет асларын татпага амаллы болды.
Полтавское авылында уьш ногай аьел яшайды, айтпага, Ибрагим эм Ирина Сарыбасовлар, Руслан эм Фатима
Картакаевлер, Фатима Бесленеева. Олар баьриси де бу бек кызыклы, юреклерди йылыткан эм туьрли миллетли аьдемлерди ювыкластырган фестивальде оьз балалары ман бирге миллет кийимлерин кийип катнастылар. Ярасык ногай термесинде аьвелгиде халкымыз уьйшиликте кулланган савытларды, бала бесигин, сыпырага мол берекетти туьздилер. Бу исте оларга Орта-Тоьбе авылынынъ маданият уьйининъ куллыкшылары оьз ярдамын эттилер. Солай ок бу ногай аьеллер исси
курале аькелип, шара катнасувшыларынынъ баьрине де онынъ даьмин таттырдылар. Фестиваль катнасувшыларынынъ терек тоьгерегинде кол ысласып айланувы – шарадынъ оьзеги болды. Олар бирбирине йылы йоравлар айттылар. Оннан сонъ авыл маданият уьйининъ залында концерт оьтти, мунда туьрли миллетли яратувшылык коллективлер ортакшылык эттилер. Концертте Орта-Тоьбе авыл мектебининъ окувшылары ногайдынъ «согысларда куьш берген» домбырасында ойнап йырладылар, ногай халкы акында хабарладылар. Бу куьнги йылы, конъил коьтерилис аьлде озган фестиваль аьр биревдинъ эсинде коьпке дейим сакланаягына
шекленуьв йок.
Н.Кожаева.
Суьвретте: фестивальден коьринис.