Равиль Утемухамедович Джумановтынъ аты Астрахань областиндеги ногай халкынынъ тарихинде дайымга ерлескен. Буьгуьнлерде 88 яс толув куьнин белгилевде, биз
шынты патриоттынъ эм йол коьрсеткишининъ ногайлардынъ этномаданият козгалысынынъ биринши етекшилерининъ бириси, белгили аьдемди эсимизге аламыз. Онынъ таьвесилмес кайратлыгы аркалы 80-нши йыллардынъ сонъында регионда Сеитовка авылынынъ 200 йыллык мерекеси белгиленген. Ол оьз ердеслери мен аралык байланысты беркитип эм маданият пан авысувга янъы яшавды берип келген. Солай болып, онынъ баславы ман ногайлар яшайтаган баска регионлардан
яратувшылык коллективлерининъ биринши гастрольлери оьткенлер. Айтпага, онынъ баславы ман 1991-нши йылда Астрахань областинде Джанибеков
окувларынынъ, Ногай маданияты куьнлерининъ, «Шешекейлер» балалар уьшин фестивалининъ озгарылув аьдетлери тувганлар.
Равиль Утемухамедовичти халк арасында тек маданият аьрекетшиси тувыл, оьнерли журналист деп те биледилер. Ол ерли телевидение, радио бойынша ногай эм
орыс тиллеринде программаларды юритуьви мен, каравшыларга эм тынълавшыларга кызыклы тарихлерди эм маьнели билдируьвлерди еткерип келген.
Буьгуьнлерде биз ногай маданиятымыздынъ сакланувына эм оьрленуьвине баасыз уьлисин коскан аьдемди – Равиль Джумановты эскеремиз. Онынъ иси, Россия
халкларынынъ оьрленуьвине ымтылган эм оьз тамырлары ман оьктемсийтаган, онынъ баславын бардыратаганлардынъ юреклеринде яшап келеди.
Р.Шугаипов.
Суьвретте: Равиль Джуманов.