Китай календари бойынша Янъы 2026-ншы йыл Кызыл Отлы Атынынъ белгиси астында озаяк. Ызгы кере Кызыл Отлы Атынынъ йылы 1966-ншы йыл болган – ол янъы туьрленислер, уьйкен ашылувлар, яркын музыка, кино эм спорт оьзгерислерининъ йылы болган. Сога коьре, экспертлер келеяткан 2026-ншы йылдан да сондай уьйкен, яркын оьзгерислерди куьтедилер.
Янъы 2026-ншы йылды астрологлардынъ маслагаты ман коьп, коьтеринки коьнъилли аьдемлер мен, аьел яде дослар тоьгерегинде йолыгув керек, бир туьйир де ялгыз калмага ярамайды. Олардынъ белгилеви мен, не шаклы суьйиниш, куьлки болса, сол кадер наьсип келеяткан йыл аькелер. Бай сыпыралар, завыклы
йырлар, биювлер эм кызыклы ойынлар болса бек яхшы.
Хатынлар Янъы йыл кешесининъ сыпырасынынъ акында эртеректен ойланадылар. Сонынъ уьшин астрологлардынъ язганларына таянып, мунавдай маслагатлар этемиз.
Сыпырага кызыл яюв тоьсеп, майшыраклар якпага боласыз, тек саклыкты тутынъыз, солай ок ярасык савытлар, алтын туьсли тепсеклер тизинъиз. Этли асларды коькистен, баьпийден аьзирлемеге керек, бир туьйир де тайдынъ этиннен аслар болмасын. Йыл белгисининъ аваслыгына коьре, тавык пан балык эм уьйкен малдынъ эти болганы да ийги тувыл. Ат пыхы эм алма суьеди, солар ман бирге салатлар да коьп салынъыз. Петрушка, укроп, салат япыраклары ман
азыкларды безекленъиз. Ат таьтли зияпетлер суьеди, сога коьре олардынъ туьрлилерин аьзирлемеге боласыз. «Красный бархат» торты да оьз туьси мен бек келисли болаяк. Емислер мен ясылшалардан кызыл туьслилерин салсанъыз яхшы, айтпага, нар алма (гранат), шувылдыр (свекла) клубника эм баскалар. Ат спиртли ишимликлерди суьймейди, олардынъ енъил дегенлерин, айтпага, шампанское ман шагыр сыпырага салмага боласыз, а компотлар, лимонадлар, соклар нешаклы суьйсенъиз болсын.
Байрамлар, боьтен де Янъы йыл, бизим халкта савкатларсыз болмайды. Кардаш-ювыкларга, танысларга савкат тапшырмага аьр биримиз суьемиз. Сога коьре Кызыл Отлы Ат йылында не зат бермеге ярамайтаганын эм керекли экенин язайык.
Астрологлардынъ билдируьви мен, белбавлар, галстуклар, куьшли ийиси болган ийисли сув, пышаклар, каншылар савкатлаганын йыл белгиси суьймес. Янъы 2026-ншы йылга спорт пан байланыслы болган затлар берсенъиз, ийги болар, айтпага, кроссовки аяк кийимин, спортзалга абонемент.
Соны ман бирге ярасык бастараклар, кремлер, кызыл калтай, алтын юзиклер, ямылмага болган йылы затларды да йигерли кепте ювыкларга бермеге боласыз деп экспертлер белгилейдилер. Солай ок дорбага ден савлыкка пайдалы алмалар, бал, козылар салып элтесенъиз де, ювыкларынъыз бан бир йыл белгиси де суьйинер.
Аьзирлеген Н.Кожаева.