Сайлавлардынъ биринши куьнинде ок Терекли-Мектеб авылдынъ 1147-нши номерли орталык участок сайлав комиссиясы орынласкан Халк яратувшылык уьйине Ногай район орталык больницасынынъ ис коллективи етекшиси, бас врач Фаризат Межитовадынъ басшылыгы ман баьриси бирге келип, оьзлерининъ гражданлык борышын толтырдылар. Коллективте 40 йылга ювык заман ислейтаган медицина куллыкшысы Фаризат Мусаурова бизим ортак бир элимиз Россиядынъ тынышлыгы эм эмишлиги уьшин оьз тавысын берди. – Буьгуьн биз патшалыгымыздынъ эм республикамыздынъ йогары парламентлерине сайлап турган партиялар эм кандидатлар сонъында сайлав алдында берген оьз соьзлерин тийисли кепте акласын деп йорайман. Республикамызда эм районымызда савлык саклав тармагына заманы ман буьгуьнги кебинде керекли медициналык технологиясы, дарманлар, коьликлер берилип турсын, неге десе аьдем савлыгы – ол Элимиздинъ берклиги, эртенъги куьнге сенимлиги, – деди Фаризат Мусаурова.