Бизим коьпмиллетли республикамыздынъ Аькимбасы Сергей Меликов Дагестан Республикасынынъ Халк Йыйынынынъ сессиясында соьйлевинде Россия
халкларынынъ бирлесуьв йылын регионымызда ашты. Парламенттинъ депутатларына каратылган соьзинде С.Меликов Коршалавшы йылы Россия халкларынынъ бирлесуьв йылына коьшкени бек маьнели, неге десе ямагаттынъ бирге ислевининъ иси бардырылып турады деп белгиледи.
– Бизим республикамызга халк бирлиги айлак та терен маьнели болады. Орыс аьскерши мусылманнынъ намазын саклап, православие эм ислам аьрекетшилери бизим аьскершилеримиз уьшин тилек тилеп, биз бирбиримиздинъ коьзимизге сый эм сеним мен карап турган шаклы бизди бирев де енъип болмас, – деп айтты регион басшысы.
Россия Президенти Владимир Путиннинъ Указы ман 2026-ншы йыл элимизде яшайтаган туьрли халклардынъ бирлесуьвине багысланган. Сол карарга
коьре, тагы да бир байрам косылды эстеликли куьнлерге – кырк кийик айынынъ 8-нши куьнинде Россия халкларынынъ тиллерининъ куьни белгиленеек. Сол куьнди сайлав да босына тувыл, неге десе савлай дуныя сол заман уллы шаир, Дагестан халкынынъ данъклы увылы Расул Гамзатовтынъ тувган куьнин байрамшылайды.
Дагестан халклары биргелесип, кайзаманда да керексинетаганларга колын созганлар. 2023-нши йылдынъ тамбыз айыннан алып Дагестан Республикасы Запорожская областининъ Михайловский районына материаллык эм техникалык яктан ярдам этеди. Озган йыллардынъ ишинде республикада Курск эм
Белгородская областиннен 500-ден артык балалар тыншайганлар, савлыгын берклендиргенлер.
Сонынъ эм СВО катнасувшыларына эм олардынъ аьеллерине коьмек этилуьви бизим бас борышымыз экени акында айтты Сергей Меликов оьз соьйлевинде.
Айтылган болжалдынъ ишинде СВО ерине гуманитарлык юклер, сонынъ ишинде кийимлер, азык-туьлик, курылыс алатлары йиберилген.
– Биз баьтирлеримиз бен оьктемсиймиз, баьримиз косылып оларды коьтергишлеймиз, кол эм соьз ярдам этемиз, – деди Сергей Меликов.
Дагестанлылар республика басшысына сенедилер, онынъ аьрекети регионымызды оьрлендируьвге эм халкларды бирлестируьвге каратылган. Биз оьз бирлигимиз бен куьшли эм келеекте де кишкей Аталыгымыз Дагестаннынъ эм уллы Россиядынъ онъайлыгына оьз исимизди бардыраякпыз деп сендиремиз.
Г.Бекмуратова
