Авыл еринде медицина куллыкшысынынъ кесписи – энъ сыйлы эм керекли кеспилерининъ бириси.
Сол кеспи ян йылувлыкты, сахыйлыкты, уьйкен шыдамлыкты талаплайды. Тек шыдамлы, сезгир, юре-
ги ашык аьдемлер сол кеспиге алаллыгы ман баскаланадылар. Бир кере бирев булай деп айткан: «Медициналык куллыкшысы – ол аяксыздынъ аягы, колсыздынъ – колы, сокырдынъ – коьзи, сакавдынъ – авызы, осалдынъ – коьтергишлеви, анадынъ – коьмекшиси, балага – онынъ артыннан каравшысы». Ойлап караганда, сол соьзлер бек акыйкат айтылганлар. Баска болып, медициналык куллыкшысы авырыган ясуьйкен аьдемге эм балага оны тешкеруьвли тынълап билген, керек ерде оьз колын ярдамга созган психолог та болады.
Суьйикли исине яшавынынъ 35 йылларга ювыгын багыслап келди Татлихан Юманияз кызы Рама-
занова (Савкатова). Ол 1965-нши йылдынъ курал айынынъ 11-нши куьнинде Ногай районынынъ Эди-
ге авылында Юманияз эм Кансылув Савкатовлардынъ коьпбалалы аьелинде тувып-оьскен. Ерли мек-
тебте 9-нши классты окып тамамлаган сонъ, Татлихан Юманияз кызы Астрахань каласындагы медици-
налык училищеге туьсип, онда ян шакырувы ман сайлаган кесписин байырлайды. Медицина тармагын-
да биринши абытларын ол Астрахань областининъ Камызякский районында акушер болып аьрекет-
левиннен баслайды. Бир йыл куллык эткеннен сонъ, ога 1989-ншы йыл Ногай районынынъ Кумлы авы-
лындагы врачебный амбулаторияда акушер эсабында аьрекетлемеге туьсти. «Мен бир де коркпадым,
неге десе медицина куллыкшысынынъ ис аьрекетинде коркынышка ер йок, солай болмаса, сенинъ оры-
нынъ медицинада тувыл. Аьллер туьрли болады, ама кайзаманда да сен шыдамлы болып, оьзинъди
тутып билмеге керексинъ», – дейди ол, оьзи сайлаган кесписи акында.
1995-нши йылдан алып оьзининъ ис аьрекетин фельдшер болып тувган Эдиге авылында бардырып
келди. Кайда тувды, сонда пайдалы болды дегенлей, ол оьзининъ тувган ерине, авылдасларынынъ
ден савлыгын саклавда алаллыгын коьрсетип келеди. Ол кеше-куьндиз демей, шиллединъ иссилигине де карамай, авылдасларына ярдамга тез болып етип, колыннан келген коьмегин эткен. Эдиге авылын-
да онынъ йылы соьзи, уста коллары эмленмеген, ак юректен разылыгын билдирмеген аьдем эш те аз болар. Узак йыллар бойында йыйган бай сулыбы оьз емислерин берген заман да етти.
Кыскаяклыдынъ сол тармакта коьрсеткен уьстинликлери Сый грамоталар, Разылык хатлары ман,
баргылы савгалары ман коьп кере белгиленген. Ян косагы Багавдин мен курган аьелде эки аьвлетлери, айтпага, кызы Кульсим эм увылы Явгайтар да анасынынъ йолын кувып, медициналык кесписин байырлап, туьрли калаларда суьйген кеспилери бойынша каьрлейдилер. Буьгуьнлерде балдан таьтли уныклары, йиенлери де оьсип куьезлерин арттырадылар.
Айтып озайык, мектебте окыган шагыннан алып буьгуьнге дейим де Татлихан Юманияз кызы тув-
ган авылында, районда маданият бойынша ямагат шараларынынъ да белсенли катнасувшысы. Ол тек ногай йырларын йырлап калмай, ятлав язув оьнери мен де баскаланады. Сол оьнер де ога Эдиге авылында белгили халк авызлама яратувшылыгыннан уьйкен усталыгы ман баскаланган Кансылув анасыннан коьшкен де болар. Янъыларда Татлихан Юманияз кызы оьзининъ 60 йыллык мерекесин суьйикли балаларынынъ, кардаш-тувганларынынъ тоьгерегинде шатлыклы аьлде белгиледи.
Биз де кыскаяклыды 60 йыллык мерекеси мен эм келеятырган кеспи байрамы ман ак юректен кутлай-
мыз, алдыда да ога берк ден савлык, узак оьмир, етимислер, яшав онъайлыкларын йораймыз.
Г.Нурдинова,
РФ Журналистлер союзынынъ агзасы.
Суьвретте: Татлихан Рамазанова.