Йылдынъ энъ де кыска 22-нши декабрь куьнинде элимиз сол куьнди эм бизим баска куьнлеримизди эм туьнлеримизди ярыкка эм йылувга толтыратаган куллыкшылардынъ кеспи ис байрамы – Энергетик куьнин белгилейди. Энергетиклердинъ куллыгынынъ баасын оьлшемеге кыйын, неге десе олардынъ иркуьвсиз ислеви аркасы ман бизим уьйлеримизде, мектеблерде, больницаларда, балалар бавларында, ис офислеринде тийисли онъайлыклар туьзиледи.
Энергетик куьни – ол энергетика тармакларын курув эм канагатлав куллыгына катыскан аьдемлердинъ кеспи байрамы. Бу солай ок буьгуьнлерде де
кыс демей, яз демей энергетика тармагында яваплы ис борышын толтыратаган, электроэнергия олар уьшин тек соьз тувыл, савлай заман кесеги болып саналатаган аьдемлердинъ куьни болады.
Бу байрамнынъ тарихи 1920-ншы йылдынъ 22-нши декабрь куьнинде Москвада VIII Савлайроссиялык Советлер курылтайында ГОЭЛРО планы кабыл этилинген заманнан басланады. Соны эске алып, 1966- ншы йылдынъ 23-нши май куьнинде алдынгы СССР Оьр Советининъ Президиумынынъ Указы ман Энергетик куьни токтастырылады.
Энергетик куьни – ол энергетика промышленность куллыкшыларынынъ экономикалык оьрленуьвге, халктынъ аьр куьнлик яшавын ийгилендируьвге этетаган косымына разылык билдируьв ниетте белгиленеди. Аьдетке коьре энергетиклерди кеспи байрамы ман Россия Президенти де кутлайды. 2022-нши йылда
Владимир Путин энергетика тармагынынъ специалистлерине Донбасстынъ, Запорожье эм Херсон областьлерининъ бузылган энерготармакларын кайтадан тургызувга этетаган уьйкен ис уьлиси уьшин разылык билдирген. 2023-нши йылдагы кутлавында президент энергетика комплексин экономикадынъ негизли эм стратегиялык тармакларынынъ бириси деп атаган. 2024-нши йылда патшалык етекшиси Донбасста, Новороссия эм СВО ерине ювык орынласкан регионларында куллык этетаган энергетиклердинъ йигитлиги уьшин оларга разылыгын билдирген эм электротармаклар хозяйствосын модернизациялавды эм аталык энергетикалык машинакурылыс тармагын оьрлентуьвди келеектеги асыл борышлар эсабында белгилеген.
Быйыл Ногай район энергетиклери Уьйсалган авылындагы эски электротеллерди толы кебинде, Нариман авылынынъ 90 процент электротеллерин
янъыларына авыстырганлар. Сол ок кепте эски теллер Орта-Тоьбе авылында 1 орамда, Червленные Буруныда 2 орамда, Бораншыда 3 орамда, Шумлеликте
4 орамда, Терекли-Мектеб авылынынъ саниятлар мектебининъ микрорайонындагы 6 орамларда янъыларына авыстырылып алынган. Баьриси энергетиклердинъ аьрекети мен район бойынша 215 электрокурыклар авыстылар, 55 электротрансформаторлар да ярастырылды, электротрансформаторлардагы 21 разъединительлер салындылар. Кумлы авылы беттеги кой котанлар участогындагы 6 шакырым узын бойы ман 25
миллиметр квадратлы ПС темир электротеллер орынына АЭС электротеллери тартылдылар. Сол маьселеден тура бу яктагы малшылар бир неше кере сорав коьтергенлер эм сол эндигиси шешилди демеге керек.
Ногай РЭС коллективининъ куллыкшысы Камиль Атангулов оьз ыхтыяры ман Россия коршаланув министерствосы ман контракт туьзип, аьлиги заманда согыс спецоперациясында катнасады. Ол сонда оьз халкын эм ис коллективин тек ийги ягыннан коьрсетип келеди эм сол зат пан район энергетиклери де оьктемсийдилер. Буьгуьнлерде Камиль тувган ерине отпускка келген эм янъыларда ол оьзининъ ис йолдаслары ман йолыгыскан. СВО катнасувшысы согыс
спецоперациясынынъ барысы, россия аьскершилерининъ фронт яшавы акында кыска кепте хабарлаган, оьзине берилген соравларга яваплаган.
Ногай районнынъ электротармаклар коллективи савлайы Дагестан Республикасы бойынша баьри ис коьрсетимлери беттен 1-нши орынды алады эм соны биревге де бермей ыслап келеди. «Коллективимиз яс, тыпак, аьдемлер бир-бирисин анълап, сыйлап боладылар. Бизим ис коллективимиз баьри де район яшавшыларын янасып келеяткан Янъы 2026-ншы йыл ман кутлайды. Аьр бир аьелге эмишлик, тынышлык, ден савлык, янъы уьстинликлерди, янъы ийги хабарларды, бир аьруьв дегенде аьруьв, эртегиге кусаган аьлемет Янъы йыл кешеси болганын йорайды», – дейди Ногай РЭС начальниги РамильМуслимов.
М.Юнусов.
Суьвретте: СВО ортакшысы Камиль Атангулов (ортада) оьз ис йолдаслары, Ногай РЭС куллыкшыларынынъ бир кесеги мен.
