«Шоьл тавысы» республикалык газетасынынъ коллективи Дагестан Язувшылар союзындагы ногай секциясы ман бирге Ана куьни алдында йигитлерше ян берген согыс спецоперациясынынъ катнасувшыларынынъ аналары – Карагас авыл яшавшысы Боранбийке Азизова эм ТереклиМектеб авыл яшавшысы Халимат Кулунчакова ман йолыгыс озгардылар.
Сыйлы конакларды хош коьрип алаятып, газетадынъ бас редакторы Эльмира Кожаева ер юзиндеги аьр аьдемге баалы эм боьтен де суьйикли увыллары оьз аьскер борышларын энъ сонъына дейим толтырып, Эли уьшин ян берген аналар уьшин Ана куьнининъ маьнелигин айырым белгиледи. Ол солай ок 2022-нши йылдынъ ызыннан алып, газетадынъ редакциясы мундай шараларды СВО катнасувшылары ман да, олардынъ аналары ман да оьткерип келуьвине эс этти.
СВО-да янын берген Арсланбек эм сонда ортакшылык эткен Анварбек Азизовлардынъ анасы Боранбийке увылы Арсланбек коьп ерлерде болганын, Сирия
Республикасында да согыс оьзгерислерде катнасып, аьр заман да аман-эсен келгенин, а мунда баьтирлерше ян бергени акында айтты. Онынъ соьзи мен, аьли
буьгуьнге дейим де Арсланбектинъ командирлери мен согыс йолдаслары онынъ ата-анасы кайдай шынты эр йигитти тербиялап оьстиргенлери эм эндигиси
оларга да сондай коркыныш билмеген, явдынъ ягасыннан сермеген аьскершидинъ етиспейтаганы акында язадылар. Ол соны ман бирге редакция журналистлерине, Ногай районынынъ СВО катнасувшылары акында язылатаган макалаларды йыйнап, бир айырым китап шыгарув керек эди деген ойын айтты. Бу соравга белгили журналист, Дагестан Язувшылар союзындагы ногай адабият секциядынъ етекшиси Гульфира Бекмуратова яваплады. Ол эндиги йылга китап издательствосына бизим районнан СВО катнасувшылары акында китап шыгарув акында аьризе бергенин билдирди. Газетадынъ баьри журналистлери де ногай халкымыздынъ баьтир ваькиллери акында СВО басланган куьнлерден алып язып келуьвин айырым белгиледи. Сол материалларды тергеп-тешкерип, баспага аьзир этуьв керегеди, эм
бу куллыкты да ол оьзи этеегине сендирди.
Муннан сонъ Боранбийке Азизова увылы Арсланбек яшаган орамга онынъ атын беруьв акында хат пан Дагестан Аькимбасы Сергей Меликовка эм Карагас авыл аькимбасы Мурат Капашовка тилек эткенлери акында айтты. Бу сорав арасы бир юма да кетпей шешилген. Ана уьйкен разылыгын оларга эм сол орамдагы электроярыкларды ярастырган эм йолды туьзеткен ясларга да билдирди.
Халимат Кулунчакова онынъ да эки увыллары Якуб пан Джамал СВО ерлерине оьз эрки мен кеткенлери акында айтты, неге десе, онынъ соьзи мен, олар экеви аьелде бирге оьскенлер. Джамал материал-техникалык канагатлав штабында куллык эткен, сонъында штаб алдыга кетеди, ол коьмир заводында калады.
Якуб болса, баска аьскер боьлигинде эди. Бир куьн Джамал уьйдеги анасына ол агасын излеп тапканы эм оны барып коьрип келгени акында хабарлайды.
Сонъында ол агасынынъ оьлими акында эситкенде, басында сол хабарга ынанмаганы, Якуб сондай да белсенли йигерли аьскерши дуныядан таймага болар деп
бир де ойламайтаганы акында билдирген.
Халиматтынъ соьзине коьре, увылы Джамалдынъ аьскер боьлигин быйыл 5-нши май айында СВО ериннен шыгарганлар, аьлиги заманда ол Оренбург янындагы Тоцк каласында борышын толтырады эм Таджикистан ерине кетпеге аьзирленеди. Ана кайгылы тавысы ман Якубтынъ аьскер боьлигине де СВО ериннен шыкпага 5 куьн калып туры эди ше, дейди, ама согыстагы аьллер баскалай туьзилдилер…
Бу йылы эм кайгылы йолыгысты тамамлай келип, Эльмира Кожаева конакларды келеяткан Ана куьни байрамы ман кутлады эм аьр бирисине шешекей дорбаларын ыслатты. «Бизим журналистлеримиз, СВО басланган биринши куьннен алып, сонынъ катнасувшылары ман бирге болып, аьр куьн сайын олардынъ йигитликлери акында оьзлери язатаган макалалары ман СВО-га демевлик этедилер.
Согыс спецоперациясы буьгуьнлерде, миллет баскалыкларына карамастан, Россиядынъ баьри гражданларын да бирлестирди», – деди ол.
М-А.Ханов.
Суьвретте: йолыгыс аьсеринде.
