Янъыларда Червленные -Буруны авылында ис борышларын толтырган мезгилде баьтирше янын берген милиция тамада сержанты Замир Акмурзаев дуныядан тайганлы 20 йыл болувына багысланган шара озды. Шарада патшалык органлар ваькиллери, солардынъ сырасында Дагестан Республикасынынъ Кавыфсызлык советининъ секретари, генерал-майор Магомед Гусейнович Баачилов, Ногай район администрациясынынъ аькимбасы Джамалутдин Эсиргепов, билимлендируьв боьлик етекшиси Амирхан Межитов, согыс спецоперация катнасувшысы Фарида Менласанова эм Замир Акмурзаевтинъ кардаш-тувганлары ортакшылык эттилер.
Митинг катнасувшылары 2006-ншы йылда оьз яшавынынъ баасы ман онлаган балалардынъ яшавын куткарган Замир Акмурзаевтинъ йигитлиги белгиленди. Генерал-майор Магомед Баачилов яс несил уьшин оьзин аямав эм эрклик уьлгиси болган баьтирликлер акында эсти саклавдынъ маьнелигин билдирди. Онынъ соьзлери мен, Замир Акмурзаевтинъ эткени элине алаллыгынынъ эм терроризм мен куьресуьвдинъ белгиси болган.
Ногай район аькимбасы Джамалутдин Эсиргепов баьтирди эскеруьвге косылган аьр биревге оьз разылыгын билдирди эм терроризм мен куьресуьвде бирликтинъ эм келеек несиллер уьшин тынышлык яшавды саклавдынъ маьнелиги акында айтты. Митинг бойынша ортага шыгып соьйлегенлер Замир Акмурзаевтинъ яшавы, онынъ Владикавказдагы курылыс техникумына окымага туьскени, аьскерде эм милицияда куллык эткени эм мыратлары акында хабарладылар. Мектебтинъ янындагы тасланган меканда ясырынган караклар ман атыслар барысында Замир Акмурзаев каты яраланады. Ярасынынъ куьшли авырувына да карамай, ол оьз ис йолдасларына мектебтен балаларды шыгармага амал берип, террористлерге карап атувды коймайды. Замир Акмурзаев балалардынъ яшавларын куткарар уьшин, оьзиндикин аямаган. Оьлген сонъ,
ол Эрклик орденине тийисли болган. Замир Акмурзаевтинъ эстелигине йыйылганлар бир такыйка уьндемей турдылар. Митинг баьтирдинъ эстелигине гуьл байламлар салув ман тамамланды.