Буьгуьнлерде баьриси де анъламага керекли – бизим тоьгерегимизде ийги инсанлар бар. Олар кыйынлы заманларда кайбиримизге колын созбага аьзир, олардынъ йигитлиги алдында биз басымызды иемиз. Сондай инсанлардынъ яшав йолы – бизге, яс несилге оьз элине алаллыктынъ маьнели коьрими. Россия аьскершилери коьп
йыллардан бери согысувларда баьтирлик, коркынышсызлык коьрсеткенлер. Бизим Аталыгымыз баьтирлер мен данъклы. Баьтир. Ким ол? Кайдай онынъ касиетлери? Ол – оьз Аталыгына, тувган ерине, тувганларына алаллык, керекли заманда оьз яшавын халкы уьшин курманлык этпеге аьзирлик. Бизим тынышлыгымыз
уьшин янларын берген, аьлиги заманда СВО еринде енъуьвди ювыклатып турганлар, баьтирлик коьрсеткен йигитлеримиз дайымда бизим эслеримизде
турсын. Несиллер ара патриотизм эм йигитлик аьдетлери мен бирлескен уьзилмес байланысларда бизим куьшимиз эм уллылыгымыз беркленеди.
Баьтирлер бизим яшавымыздынъ, ямагатымыздынъ бир кесеги боладылар. Олардынъ баьрисининъ де согыс етимислерин айтпага кыйын. Мен хабарымды Ставрополь крайынынъ Минераловод районынынъ Канглы авылынынъ яшавшысы Расул Арслан увылы Аджигисиев (яткан ери ярык болсын) акында бардырмага суьемен. Оьз тенълериндей болып, Расул ерли мектебте окыган, талаплы бала академический класста окыйды. Мектебти битирген заманда, Расул Ессентуки каласында Бизнес эм право институтынынъ 1-нши курсынынъ студенти деп саналган. Сонъында Расул армияга кетеди, соьйтип, яшавын бардырады – ис аьрекети, куьндегилик куллыклар, дослар, тувган аьели.
Ызгы йылларда Расул Аджигисиев Орехово-Зуево каласында ислеген, соннан СВО ерине 2024-нши йылдынъ коькек айында йол алган. Тувганкардашлары билмейтаган болган Расулдынъ контрактка кол басканын. Бу токтасты ол оьзи алган, неге десе ол – эр киси, Аталыкты саклавшы. Киши сержант званиесинде кетип,
ердесимиз коьрсеткен йигерлиги уьшин доьрт айдынъ ишинде лейтенант званиесине тийисли болган. Расул Аджигисиев оьз борышларын яваплылык пан, баьтирлик пен толтырган. Сол затты оны ман бирге согыскан йолдаслары айтадылар.
Аьскерши Волчанск, Торецк ерлеринде согыскан, яс янын Курск областининъ Черкасское Поречное еринде берген. Расул оьз Аталыгы – уллы Россиядынъ кызыксынувларын коршалавда куьшин де, янын да аямаган.
– Увылым акында айтпага мага бек кыйын. Биз эримиз бен эки бала тербияладык
– Расул эм Мархаба. Аьелимиз уьйкен тувыл, эрим тийисли тыншаювда, мен коьплеген йыллар медсестра болып иследим. Кызымыз экономист болып ислейди, эки йиенлеримиз бар. Расул аьел курмага уьлгирмеди. Мен согыс битип, ясларымыз кайтып келгенин йорайман, – деп хабарлайды Расулдынъ анасы.
Расул Аджигисиев Йигитлик ордени мен (оьлгеннен сонъ) савгаланган. Ол бизим юреклеримизде дайымларга калган.
Г.Бекмуратова.
Суьвретте: Р.Аджигисиев