Баьтирлер куьни – Россияда йыл сайын карагыс айынынъ басында белгиленетаган эстеликли куьн. Биз Совет Союзынынъ, Россия Федерациясынынъ Баьтирлерин, Данък орденлерининъ кавалерлерин эм Аталыгымыз уьшин куьшин де, янын да аямаган йигитлеримизди эсимизге оьктемлик пен аламыз.
Байрам алдында савлай элимизде, республикамызда, сонынъ ишинде – Ногай районында, эстеликли шаралар озгарылады.
Терекли-Мектеб авылынынъ А-Х.Джанибеков атындагы мектебинде шатлыклы линейкалар оьтти. 6-ншы класстынъ окувшылары «Баьтирлер болып тувмайдылар, баьтирлер боладылар» деген линейкасында катнастылар. Бу оьзгеристинъ бас борышы – элимиздинъ йылязбасынынъ данъклы бетлери
мен окувшыларды таныстырув, Аталыгымыздынъ тарих асабалыгы уьшин балаларда оьктемлик сезимин тувдырув. Баьтирлердинъ атларын баьриси де билмеге керекли, неге десе олар тынышлык яшав уьшин оьзлерин аямаганлар.
Балалар ятлавлар окыдылар, йырлар йырладылар. Юрекке тийип, СВО катнасувшысынынъ анасы, мектеб директоры Курасхан Джумагельди кызы Ярикбаева шыгып соьйледи.
Бесинши класслар Баьтирлер куьнине багысланган шарада ортакшылык эттилер. Бу куьн аьр бир Россия яшавшысына айлак та маьнели болады. Бизге тагы да бир кере баьтирлеримиз алдында басымызды ийип, савбол айтпага амал бериледи. Шара юритуьвшилери Хадиджа Романова эм Динара Шандиева бу байрамнынъ тарихи акында хабарладылар, халкымыздынъ йигитлиги акында айттылар. Линейка барысында Россия Баьтирлерине багысланган шыгармалар
окылды.
Тагы да бир яркын шара озды мектебте. 4-нши «б» классында СВО еринде йигитлерше согысып, ян берген ердесимиз, Бораншы авылынынъ яшавшысы Алибек Шамсудиновка Баьтир Партасы ашылды. Бу шарада конак болып, Алибектинъ анасы Авархан Абу кызы Шамсудинова эм тербиялав иси бойынша директордынъ орынбасары
Эльмира Тангатар кызы Суюндикова катнастылар. Савлайроссиялык билимлендируьв проекти «Баьтир Партасы» йигитлеримиз акында эсти дайымларга оьмирлетеди, ясларга олардынъ баьтирлигин коьрсетеди.
Бу шатлыклы шарады 4-нши класстынъ окувшылары Сумайя Нукаева эм Айзана Шугаипова юриттилер. Сулейман Джумакаев Алибек Шамсудиновтынъ яшав эм баьтирлик йолы акында хабарлады. Эльмира Тангатар кызы Алибектинъ анасына разылык айтты. Баьтир Партасын ашпага сый Авархан Шамсудиновага этилинди. Баьтирлер куьни – кайбиримизге де сыйлы эм маьнели куьн.
Гульфира Бекмуратова,
Россия Язувшылар союзынынъ агзасы.
Суьвретте: шарадан коьринис.
