Россия Президенти Владимир Путин РФ субъектлер етекшилери мен йолыгысувларын бардырып келип, бу йолай Дагестан Республикасынынъ Аькимбасы Сергей Меликов пан йолыгысты. Кремльдинъ официальли ваькили Дмитрий Песков билдиргенлей, йогары дережели етекшилер ара хабарласув РФ орталыгы Москва каласында оьтти.

Патшалыгымыздынъ етекшиси эм республикамыздынъ аькимбасы регионнынъ социал-экономикалык оьрленуьвининъ актуальли соравларын ортага салып
ойластылар. Йолыгыс федераллык орталыгынынъ регионлар ерлери мен планланган биргелес аьрекет этуьв мен байланыслы ис йосыгы кебинде озгарылды.
ДР Аькимбасы Сергей Меликов Россия Президенти Владимир Путин мен йолыгысувынынъ сырагылары бойынша оьз ойын Telegram-каналында билдирди.
– Аьдеттегиндей, баьри соравлар бойынша да патшалыгымыз етекшиси ягыннан коьтергишлев дегенди таптым, соны уьшин ога бек разыман. Президент
бизди эситеди, колтыклайды эм сенеди. Коьп йыллар узагында биз коьтерген соравлар ериннен козгалды, эм тезден Дагестанда аьр аьелге сезилгендей сырагыларга етисилер, – деди ол.
ДР Аькимбасы Сергей Меликов аянлап айтувына коьре, хабарласув барысында ол эл басшысына регион уьстинликлери, солай ок орын тапкан маьселелери
акында билдирди.
– Оьзек те, маьселелер акында да соьз юритилди. Бас деп, ол – электроэнергия ман канагатлав соравлары. Эскирген электросетьлерди кайтадан тургызув ман
бирге биз янъы йолларды оьрлендиремиз: республикамыз ясыл энергетика ман пайдаланув бойынша – Россия лидерлерининъ сырасында, куьн коьзи саьвлелери йылувлыгы эм ел аркасы ман ислейтаган станциялар салынадылар, – деп белгиледи Сергей Меликов.
Бу йолыгыс – Дагестан Республикасынынъ оьрленуьв соравларын ортага салып ойласувдынъ эм келеектегиге айырым мыратлар белгилевдинъ уьйкен маьнелиги бар оьзгерис.
Етекшилердинъ хабарласувы барысында куьн аьлинде айырым турган бас сорав – согыс спецоперация темасы да коьтерилди. Сол сорав йолыгыста айырым ойласылганын «Шоьл тавысы» республикалык газетасынынъ бас редакторы Эльмира Кожаева да белгиледи.
– СВО катнасувшыларды колтыклав соравларына айырым эс каратылды. Оларга туьрли яктан коьмек этуьвге, сонынъ ишинде алдышылыкка гуманитарлык
юк еткеруьвге, техника эм снаряжениелер сатып алув эм сондай баска затлар ман байланыста ярдамласувга сезимли куьш салынады. Дагестанда «Доблесть гор» деген программа яшавга шыгарылады, – деди ол.
Бу йогары дережели етекшилер йолыгысы аьр дагестанлыга уьйкен маьнелиги бар, неге десе патшалыгымыздынъ басшысы регион маьселелерине терениннен эс каратады. Салынган борышлар толтырылып, онынъ сырагылары республикамыздынъ яшавшылары уьшин пайдалыгын тийгистееги, инфраструктуралык эм инвестиционлык проеклер федераллык дережели колтыкланувы эм регион командасынынъ аьрекети аркасы ман яшавга шыгарылаягы шексинуьв тувдырмайды. Россия Президенти Владимир Путиннинъ колтыклавы эм ДР Аькимбасы Сергей Меликовтынъ етекшилеви мен бизге салынган мыратларга етиспеге, экономикадынъ армаган оьрленуьвин эм яшавшылардынъ онъайлыгын канагатлавга шартлар туьзилеек.
Любовь Уразаева,
«Шоьл тавысы» республикалык газетасынынъ яваплы секретари.