Йол хозяйство куллыкшысынынъ кеспи байрамы йыл сайын казан айынынъ уьшинши каты куьнинде белгиленеди. Бу – яс байрамлар санын, 1996- ншы йылдан алып киреди. Уьстимиздеги йыл мерекели де болады. Баслапкы йылларда байрамнынъ аты баска эди эм казан айынынъ ызгы каты куьнинде байрамшыланатаган да эди, ама РФ Президентининъ 556-ншы номерли Указына коьре, 2000- нши йылдан алып, бир юма эрте байрамшыланувга коьширилген. Йол хозяйствосы Россиядынъ ямагатынынъ энъ де маьнели эм керекли байлыгынынъ бириси болады. Йол хозяйствосы дегенине бир неше мынълаган учреждениелер эм предприятиелер киредилер.
Солай болганда, бу тармакта куллык этетаганлар саны да айлак уьйкен болады.
Йол хозяйствосынынъ куллыкшысынынъ кеспи куьни – бу йол курувшылардынъ, сав йыл ишинде йолда ярастырув ислер этуьвшилердинъ, автокоьлик айдавшылар уьшин кавыфсызлы йоллардынъ йолакларын салувшылардынъ байрамы.
Йоллар патшалыгымыздынъ инфраструктурасынынъ энъ де маьнели алаты да болады. Йол тармагы болмаса, гражданлардынъ бир ерден баска ерге эркин коьшуьви, азык-туьлик товарларды аькелуьв, аькетуьв, экономикалык пространстводынъ биригуьви мен байланыслы Россия Федерациясынынъ Конституциясынынъ статьялары
да яшавга шыгарылып болмайды.
Соннан артык болмаса, кем тувыл миллет проектлердинъ, социаллык борышлардынъ яшавга шыгарылувында автокоьлик йолларынынъ маьнелиги болады.
Мине коьресизбе, кайдай уьйкен орында йолдынъ ийгилиги алады бизим яшавымызда. Соннан элдинъ коршаланувы эм экономикалык оьрленуьви де себепли болады.
Аьлиги заманларда патшалыгымыз бан йол хозяйствосында этилетаган онъайлыклар аз тувыл.
Регионымызда да оьрленуьв алдыга барады. Ногай район еримизде де йоллар сапаты йылдан-йылга ийгиленеди. Бу куьнлерде Ногай районымыздынъ Карагас эм
Кумлы авылларында йолды ярастырув куллыклар юритиледилер. Карагас авыл ишинде 500 метр оьлшеми болган ерде капиталлык ярастырув этилген. Баьри куллыклар да «Меним Дагестаным – меним йолларым» миллет проекти ишинде юредилер.
Бу куьнлерге сол этилген йол ярастырылувлар маьнели объектлерге – мектебке, балалар бавына, спорт майданына бармага онъайлык туьзеди. Сол Карагас авылында этилген куллыкларды Ногай район аькимбасы Джамалутдин Эсиргепов Капиталлык курылыс боьлигининъ МКУ директоры Мурат Аджиманбетов пан бирге ис йорыгы ман барганда коьрип келдилер. Сол тергевлер де босына тувыл, олар этилген куллыклардынъ сапатын карайдылар.
Келеекте светофорлар, йол белгилерин салмага ниет бар. Сол затлар баьриси де йол кавыфсызлыгын туьзеди. Тергевлер юритилген шакта район аькимбасы ман курылыс боьлик етекшиси аьдемлер юретаган йол кесегин де ярастырув акында соьйлестилер. Коьп куллыклар «Кавыфсызлы эм сапатлы автокоьлик йоллары» деген миллет проекти бойынша этиледилер.
Йыл сайын автотрассалар курыладылар, солар россиянлылардынъ яшавларына да онъайлыклар киргизедилер.
Г.Сагиндикова.
