Янъыларда Дагестан Республикасынынъ «Россия – меним тарихим» паркында «Миллет оьктемлиги – 2025» баргысы шатлыклы аьлде тапшырылды.
Аьли уьшин бу шарадынъ регионлар ара кезеги тамамланды.
Бу куьн мунда йыйылганлар алдында оьзининъ кутлав соьзи мен ДР Оькиметининъ Председателининъ орынбасары Рамазан Джафаров шыгып соьйледи. Ол мундай шаралардынъ Дагестанда оьтуьви бек маьнели экенин айтты.
Сол Россия Федерациясында яшайтаган туьрли миллетлер араларында дослыкты беркитуьвге себеплигин этеди. Александр Даркович, «Россия миллетлерининъ
ассамблеясы» ямагатпатшалык организациясынынъ генеральный директоры, оьзининъ хошлав соьзин ОГО Советининъ председателиннен йиберген эди. Ол болса, сенилген борышты да толтырды эм оьзининъ атыннан Сырт Кавказ регионларыннан бу куьн мунда ортакшылык эткен шара катнасувшыларын кутлады. 2025-нши
йылда Ассамблея янъы дережеге шыгаягын эм элдинъ сегиз федераллык округларын бириктирмеге ниети барын белгиледи.
Бу куьн Дагестан Россиядынъ тил эм этнокультуралык асабалыгын байытар эм саклар уьшин туьрли кеспили аьдемлерди йолыкты.
Шатлыклы шарадынъ барысында миллетлер ара макулласувды беркитуьвге каратылган куллыкларды суьлдерлеген, солай «Баьрисине бирев» номинациялары бойынша савгалар тапшырылдылар.
Шарадынъ ызында Зикрула Ильясов, Ассамблеядынъ Дагестан регионаллык боьлигининъ председатели, Россия халкларынынъ аьдетлерин, маданиятын саклар уьшин куьш салатаганларга оьз разылыгын билдирди. Солай ок савболсын соьзди Ассамблея етекшисине бу шарадынъ регионаллык кезегин Дагестанда оьткермеге
амал бергени уьшин айтты.
Зикрула Ильясовтынъ соьйлевинде бу шарадынъ оьтуьвине Дагестан Республикасынынъ Оькимети эм ДР Аькимбасынынъ администрациясы да коьп куьш салганы белгили болды .Баргы тапшырылувдынъ регионаллык кезеги Россия халкларынынъ дослыгын эм бирлигин коьрсеткен шара болды.