Быйыл Ногай районынынъ эгиншилери баьри кепли хозяйстволар бойынша 9629 гектар ызанлардан 31775 тонна куьзлик бийдай йыйып алганлар. Аьр бир гектар орта эсапта 33 центнер онъыс берген. Язлык арпа быйыл 4294 гектарда шашылган эди, соннан баьриси район бойынша 12023 тонна болдырылган. Солай ок язлык
сулы культурасынынъ да 997 гектардан 2792 тоннасы йыйылган. Бакша культуралары да быйыл район бойынша 1874 гектар ерлерде баьриси 37480 тонна оьстирилгени белгиленген.
Ералма ясылшасы районда 135 гектарда шашылып, сырагысында соннан 2227 тонна онъыс алынган. Баска туьрли ясылшалар да район бойынша 484 гектарда оьстирилип, солардан 6534 тонна болдырылганы эсапка алынган.
Емис бавлар хозяйствосы 13 гектар ер майданларда 260 тонна емис оьстирген деп саналады.
Район еринде йыл сайын да катлыклы пишен-ем аьзирленеди. Быйыл да эгин кырлардан баьриси район фермер эм байыр ярдамшы хозяйстволары буьгуьнлерге 66 мынъ тонна пишен мен 11000 тонна тобан аьзир эткенлер.
Аьлиги заманларда эгин кырларда куьзги бийдай шашув куллыклары юритилип туры. Бу куьнге аьли уьшин 600 гектар куьзликлер шашылган. Куьзликлерди шашув куллыклары район кырларында казан айынынъ ызына дейим юритилеек.
М.Юнусов.